Хилийн чанадад дахь иргэний шинэчилсэн бүртгэл 35 улсын дипломат төлөөлөгчийн газарт явагдаж эхлээд байгаа бөгөөд өнөөдрийн байдлаар нийт 9000 гаруй иргэн бүртгэлдээ хамрагдаад байна. БНСУ-д 3 дугаар сард бүртгэлийн ажил эхэлсэн бөгөөд тус улсад одоогийн байдлаар 9200 гаруй иргэн бүртгэлд хамрагдсан.

Үүний 6000 гаруй иргэний мэдээлэл нь тус газарт ирж шалгагдсанаас 5500 иргэнд бүртгэлийн дугаар олгогдож Хөдөлмөр халамж үйлчилгээний газарт нэр нь хүргэгдээд байна. Өөрөөр хэлбэл нэр нь баталгаажиж хүргэгдсэн эдгээр иргэд хүний хөгжил сангаас хишиг хувиа хүртэх, мөн Эрдэнэс таван толгойн 536 ширхэг хувьцаа эзэмших эрхтэй болж байгаа юм. Хилийн чанадад амьдарч буй иргэдийг тус газар аль болох чирэгдүүлэхгүйгээр бүртгэлд хамрагдах боломжийг ханган тухайн иргэний иргэний үнэмлэх, гадаад паспорт, төрсний гэрчилгээ зэргийн аль нэгийг нь үндэслэн бүртгэж байгаа билээ. Харин энэхүү 3 баримт бичиг огт байхгүй тохиолдолд манай www.registrationmongolia.com болон www.burtgel.mn сайтруу орж архивын лавлагаа авах тухай хүснэгтийг бөглөн мэдээллээ үлдээж болно. Лавлагааны хариуг и-мэйл бичсэнээс хойш ажлын 5 хоногт багтаан тухайн амьдарч байгаа улсын тань элчин сайдын яамны цахим хаягруу илгээснээр Иргэн та иргэний шинэчилсэн бүртгэлдээ хамрагдах бүрэн боломжтой болж байгаа юм. Өнөөдрийн байдлаар 7 орноос огт баримт бичиггүй 90 гаруй иргэн хандаж архивын лавлагааг элчингээрээ дамжуулан авч бүртгэлдээ хамрагдаад байна. Тэгвэл Монгол Улсын нутаг дэвсгэр дээр явагдаж буй иргэний шинэчилсэн бүртгэлд өнөөдрийн байдлаар улсын хэмжээнд 16-аас дээш насны нийт бүртгэгдвэл зохих 1889774 иргэний 1832148 иргэн буюу 97,0 хувь нь хамрагдсан бол 16-аас доош насны нийт бүртгэгдвэл зохих 799132 иргэний 767224 буюу 96,0 хувь нь эцэг, эх, асран хамгаалагч дээрээ бүртгэлд хамрагдаад байна.