Монгол Улсын Ерөнхийлөгч Ц.Элбэгдорж эх орон, байгаль дэлхийгээ хайрладаг уламжлалт монгол зан заншлаа дээдэлж, хүн бүр байгалиа нөхөн сэргээх, хамгаалахад гар бие оролцох нөхцлийг бүрдүүлэх, ойн сан, ногоон байгууламжийг нэмэгдүүлэх чиглэлээр хэрэгжүүлж байгаа олон талт ажлуудыг эрчимжүүлж, улмаар үндэсний хөдөлгөөн болгон өрнүүлэх зорилгоор жил бүрийн 5, 10 дугаар сард бүх нийтээр мод тарих үндэсний өдрийг зарласан билээ.

Тэгвэл энэхүү ажлын хүрээнд өнгөрсөн амралтын өдөр Улсын бүртгэлийн ерөнхий газрын нийт албан хаагчид ногоон байгууламж бий болгох, хүүхдийн эрүүл бойжих орчинг бүрдүүлэх зорилгоор Нийслэлийн 5-р цэцэрлэгт мод тарих ажлыг зохион байгуулав. Ингэснээр хүүхдүүд өөрсдийн амьдарч, хүрээлэн буй эргэн тойрны ногоон байгууламж, мод ургамал, байгаль эх дэлхийгээ хайрлан хамгаалах ухамсарыг төлөвшүүлэхийн зэрэгцээ хүүхэд багачуудын өсөн хүмүүжиж байгаа орчинд цэвэр агаар, таатай орчинг бүрдүүлэхэд ихээхэн ач холбогдолтой юм. Мод тарих арга хэмжээнд Улсын бүртгэлийн ерөнхий газрын удирдлагууд болон 7 газар хэлтсийн төлөөлөл нийт 80 гаруй албан хаагч гар бие оролцож монос, улиас , үрэл гэсэн 3 төрлийн 80 гаруй модыг тарьж суулгав.