Тус газрын дарга Л.Мөнхбаатар Сингапур улсад зохион байгуулагдсан Хуулийн этгээдийн бүртгэлийн форум /CRF/ Олон Улсын байгууллагын 7 дахь удаагийн өндөр дээд хэмжээний чуулга уулзалтад оролцоод ирлээ.

Энэхүү чуулга уулзалтыг дэлхийн 30 гаруй улсыг эгнээндээ нэгтгэсэн тус улсын Нягтлан бодох бүртгэл болон корпорацийн зохицуулах газар хамтран жил бүр зохион байгуулдаг уламжлалтай бөгөөд Монгол Улс уг байгууллагад 2010 онд гишүүнээр элсэн орсон билээ. Тэгвэл үүний дагуу манай улсын бүртгэлийн байгууллага гишүүний хувьд оролцож улмаар бусад өндөр хөгжилтэй орнуудаас туршлага судлах, санал солилцох тэднээс судалсан туршлагыг эх орондоо бий болгож нээх нөгөө талаар энэхүү томоохон хэмжээний чуулга уулзалтыг Монгол Улсад зохион байгуулах эрхийг авахад уулзалтын гол зорилго ач холбогдол оршиж байгаа юм. Уулзалтын эхэнд Улсын бүртгэлийн ерөнхий газрын дарга Л.Мөнхбаатар Компанийн бүртгэлийн форум /CRF/ олон улсын байгууллагын Ерөнхий нарийн бичгийн дарга болон нийт гишүүдэд хандаж уг чуулганыг Монголд зохион байгуулах хүсэлтээ байгаагаа уламжилахад тэд найрсагаар хүлээн авч, чуулганыг зохион байгуулахад шаардлагатай холбогдох материалыг манайд ирүүлж, шаардлага хангасан тохиолдолд зохион байгуулах “эрх авах” сонгон шалгаруулалтанд оруулахаа мэдэгдсэн. Мөн энэ үеэр гишүүн орнууд өөр хоорондоо санал, туршлага солилцон хэлэлцэхийн дээр Корпорацийн хэрэгслийн буруу ашиглалт, Бизнес бүртгэлийн шинэчлэл, Алдаанаас шилдэг туршлага руу, Агентлагаас хороо хүртэл, Хамтарсан компанийн бүртгэгч нарын хэрэгжүүлсэн шинэчлэл, Олон улсын санхүүгийн тайлангийн системчлэл, Засгийн газрын үйлчилгээнүүдийг зангидан нэгтгэх Их Британийн хандлага, Бизнес бүртгэл-Ганагийн туршлага зэрэг өргөн хэмжээний сонирхолтой сэдвийн хүрээнд Европын болон хойд Америкийн компанийн бүртгэлийн байгууллагууд илтгэл тавьж оролцлоо. Дэлхийн өндөр нэр хүндтэй тус байгууллагаас зохион байгуулдаг энэхүү арга хэмжээг Монгол Улсад зохион байгуулах эрх авснаар Монгол Улс Хуулийн этгээдийн бүртгэлийн үйл ажиллагаа, үйлчилгээг сайжруулаад зогсохгүй бүртгэлийн салбарыг цогцоор нь хөгжлийн шинэ шатанд гаргахад ихээхэн ач холбогдолтой. Уулзалтад Малайз, Их Британи, Ирланд, Македони, Испан, Рванда, Замби, Өмнөд Африк зэрэг гишүүн 41 улсын ECRF, AICA, ERS, New Zealand Companies Office гэх мэт байгууллагуудын 150 гаруй төлөөлөгч оролцсон юм.