Улсын бүртгэлийн ерөнхий газрын дарга Л.Мөнхбаатар, БНСУ-ын Олон Улсын KOICA-ын суурин төлөөлөгч, Солонгосын судалгааны хэрэгжүүлэгч багийн ахлагч Ли Донг-Ку, Сангийн яамны Зээл, тусламжийн бодлого, хамтын ажиллагааны газрын дарга Б.Хүрэнбаатар нар “Улсын бүртгэл, мэдээллийн нэгдсэн системийг сайжруулах Цахим архивын төсөл”-ийн санамж бичигт өнөөдөр гарын үсэг зурлаа.

Энэхүү санамж бичигт гарын үсэг зурсанаар Улсын бүртгэлийн мэдээллийн үнэн зөв байдал, удирдлагын явцын бүтээмжийг сайжруулах хангах зорилготой Улсын бүртгэлийн нэгдсэн системийг Улсын бүртгэлийн ерөнхий газарт хөгжүүлж, хэрэгжүүлэх, мэдээлэл, харилцаа, технологийн тоног төхөөрөмжөөр хангаж мэдээлэл, харилцаа, технологийн үйл ажиллагааны нөхцөл, хүчин чадлыг сайжруулахад чиглэгдэж байгаагаараа онцлогтой. Мөн улсын бүртгэлийн байгууллагын цаасанд суурилсан архивыг электрон хэлбэрт шилжүүлж тэдгээрийг нэгдсэн мэдээллийн санд байршуулах, улсын бүртгэлийн сан болох иргэн, хуулийн этгээд, эд хөрөнгийн эрхийн бүртгэлийг системтэйгээр удирдах юм. Энэ нь тус газрын архивт хадгалагдаж байгаа цаасанд суурилсан 14 мянга гаруй архивын хадгаламжийн нэгжийг цахим буюу дижитал хэлбэрт шилжүүлж цахимжуулж байгаагаараа ихээхэн ач холбогдолтой. Ингэснээр иргэд цаг хугацаа орон зайнаас үл хамааран иргэний болон улсын бүртгэлтэй холбоотой бүхий л төрлийн лавлагаа үйлчилгээг цахим хэлбэрээр шуурхай авах нөхцөл бүрдэнэ. Тухайлбал иргэний гэр бүлийн 8-н төрлийн лавлагаа болох төрсний, үрчлэлт, гэрлэсний, гэрлэлт цуцлалтын, овог нэр өөрчилсний зэрэг эдгээр лавлагааг авахдаа тухайн оршин суугаа газраасаа шууд цахимаар авах бүрэн боломжтой болох юм. БНСУ-ын Олон Улсын KOICA-гаас 4 сая америк долларын буцалтгүй тусламжаар санхүүжүүлж буй “Улсын бүртгэл, мэдээллийн нэгдсэн системийг сайжруулах Цахим архивын төсөл” ийнхүү хэрэгжсэнээр Монгол Улсад Бүртгэл мэдээллийн нэгдсэн тогтолцоог бий болгох үндэсний хөтөлбөрийн хүрээнд авч хэрэгжүүлж буй ажлын томоохон, шинэ дэвшилтэд ажил дахин нэгээр нэмэгдэж байгаа нь Монгол Улсын бүртгэлийн байгууллагад түүхэн тэмдэглэлт үйл явдал болж буй хэрэг юм. “Улсын бүртгэл, мэдээллийн нэгдсэн системийг сайжруулах Цахим архивын төсөл”-ийн санамж бичигт гарын vсэг зурах ёслолд БНСУ-ын Олон Улсын KOICA-ын суурин төлөөлөгч, Солонгосын судалгааны хэрэгжүүлэгч багийн ахлагч Ли Донг-Ку, Улсын бүртгэлийн ерөнхий газрын дарга Л.Мөнхбаатар, Сангийн яамны Зээл, тусламжийн бодлого, хамтын ажиллагааны газрын дарга Б.Хүрэнбаатар нар болон албаны бусад хvмvvс оролцлоо.