Иргэний цахим үнэмлэх бий болгохтой холбогдуулан Эстони улсын төлөөлөгчдийг хүлээн авч уулзлаа

Улсын бүртгэлийн брөнхий газрын орлогч дарга С.Энхбаатар Эстони улсын Гадаад хэргийн яамны Хоёр талт хамтын ажиллагааны газрын ерөнхий захирал Март Волмер тэргүүтэй төлөөлөгчдийг өнөөдөр хүлээн авч уулзлаа.

Уулзалтын эхэнд тус газрын орлогч дарга С.Энхбаатар Эстоний байгууллагууд цахим бүртгэл, цахим үйлчилгээ чиглэлийн хувьд өндөр хөгжсөн, Монгол Улсын бүртгэлийн байгууллагад шилдэг туршлага болж чадахуйц улсын нэг гэж үзэж байгаа тухай хэлж энэ чиглэлээр хамтран ажиллах болсонд баяртай байгаагаа илэрхийллээ. Мөн тэрээр Монгол Улсын Засгийн газраас хэрэгжүүлж буй хөтөлбөрийн хүрээнд өнгөрсөн жилээс цахим бүртгэл, цахим мэдээллийн санг бүрдүүлэх ажлыг хийж байна. Энэ хүрээнд иргэдийг иргэний шинэчилсэн бүртгэлд хамруулж хурууны хээ, зураг зэрэг иргэний шаардлагатай бүхий л мэдээллийг цуглуулах, бүртгэх, улмаар нийт иргэний мэдээллийг давхар баталгаажуулах томоохон ажлыг эхлүүлсэн нь өнөөдрийн байдлаар үр дүнтэй дуусах шатандаа явж байна. Шинэчилсэн бүртгэлийн ажил явагдсанаар иргэний цахим үнэмлэх олгох ажлын суурь дэд бүтэц тавигдаж байгаа юм. Иймээс манай Улсын Засгийн газраас цахим үнэмлэх хийх ажлыг дэмжин батлаад байгаа бөгөөд энэ ондоо багтаан бид цахим үнэмлэх нэвтрүүлэх ажлыг эхлүүлэхээр төлөвлөөд байна гэлээ. Гадаад хэргийн яамны Хоёр талт хамтын ажиллагааны газрын ерөнхий захирал Март Волмер мөн хамтран ажиллах болсонд талархлаа илэрхийлж өөрийн оронд иргэний цахим үнэмлэх буюу ID-card-ийг нэвтрүүлж хэрэгжүүлсэн ажлын туршлагаасаа танилцуулан мэдээлэл өгөв. Энэ үеэр тэрээр энэхүү картыг нэвтрүүлж эхлэх үед иргэдэд төвөгтэй бэрхшээлтэй санагдаж хэрэгжилт удаан явагдаж байсан. Гэсэн хэдий ч бага багаар картын үйлчилгээ нэмэгдэхийн хэрээр иргэд идэвхтэй бүртгүүлэх болсон тухай хэлж дээрх ажлыг эхлүүлэхийн тулд тухайн үед Сингапур, Австрали зэрэг улсын туршлагаас судлан хэрэгжүүлж байсан. Харин одоо бол иргэдээ ID-card-тай болгох ажлыг хийж хэрэгжүүлэх явцад гарч байсан алдаа дутагдлаасаа суралцсанаар бусад улс орноос илүү өндөр хөгжиж боловсронгуй болсон гэж үздэг тухайгаа онцлон хэлж байсан юм. Уулзалтын төгсгөлд хоёр улсын бүртгэлийн байгууллагууд шууд хэлхээ холбоо тогтоох, сонирхсон аливаа асуудлаар зөвлөлдөх, мэдээлэл солилцох, сургалт семинар зохион байгуулах, боловсон хvчин сургах зэрэг олон асуудлаар санал солилцлоо. Манай улсын тухайд иргэний бүртгэлийг цахимжуулах, иргэдэд цахим үнэмлэх олгох ажлыг эхлүүлэхтэй холбогдуулан гадны өндөр хөгжилтэй улс орны бүртгэлийн байгууллагаас туршлага судлах, энэ талаар санал солилцох, ижил төстэй байгууллагуудтай холбоо тогтоож хамтран ажиллах шаардлагатай байгааг илэрхийлж, харилцан ярилцсан юм.

Please publish modules in offcanvas position.