Хилийн чанадад ажиллаж, амьдарч байгаа Монгол Улсын иргэдийг Иргэний шинэчилсэн бүртгэлийн ажил эхлэхтэй холбогдуулан тус газрын төлөөлөгчдөөс бүрдсэн баг БНСУ-ын Сөүл хотноо ажиллаж байна.

Баг бүрэлдэхүүн Монгол Улсаас БНСУ-д суугаа Элчин сайдын яамны удирдлагуудтай уулзалт хийж, хилийн чанадад дахь иргэний шинэчилсэн бүртгэлийн нээлтийн арга хэмжээг хамтран амжилттай зохион байгууллаа. Мөн бүртгэлийн ажил эхлэж байгаатай холбогдуулан тус яамны бүртгэл, консулын ажилтнуудад иргэний шинэчилсэн бүртгэлийн ажлыг хэрхэн зохион байгуулж, ажиллах талаар сургалт явуулсан юм. Сургалтаар иргэний шинэчилсэн бүртгэлийг хөтлөх журам танилцуулах, иргэний гэр бүлийн байдлын бүртгэл болон шинэчилсэн бүртгэлийн ажлыг хийхэд анхаарах зарим асуудал, цаашид авах арга хэмжээ, хурууны хээ, фото зургийг стандартын дагуу хэрхэн авах, бүртгэлийн тоног төхөөрөмжийн аюулгүй ажиллагаа, програмтай ажиллах, иргэний шинэчилсэн бүртгэлийн мэдээллийг хэрхэн, яаж тулгах зэрэг бүртгэлтэй холбоотой бүхий л сэдвийн хүрээнд чиглэл өгч, заавар, зөвлөгөө, мэдээлэл хүргэх ажлыг хийж байна. Цаашлаад Монголчууд олноор оршин суудаг гадаадын зарим оронд тухайн улсын дипломат төлөөлөгчийн газартай хамтран монгол иргэдтэй уулзалт, сургалт хийж, Хүний хөгжил сангаас олгож буй хувь хишиг, нийгмийн халамж, даатгал, тэтгэвэр, тэтгэмж болон иргэний шинэчилсэн бүртгэлд гадаад улсад суугаа монгол улсын иргэн хэрхэн хамрагдах талаар зөвлөгөө мэдээлэл өгөх ажлыг үргэлжлүүлэн зохион байгуулахаар төлөвлөөд байна.

Сургалт 4 дүгээр сарын 1-ний өдрийг хүртэл үргэлжилэн явагдах юм.