Улсын бүртгэлийн байгууллага нэгдсэн зохион байгуулалтад орж, бүртгэлийн хууль эрх зүйн орчин бүрдсэнээс хойш салбарын орон нутгийн удирдах ажилтны зөвлөгөөнийг тус газар 2 дахь жилдээ уламжлал болгон зохион байгуулж байна.

Уг арга хэмжээ өчигдөр Улаанбаатар хотноо эхэлсэн бөгөөд зөвлөгөөний арга хэмжээг нээж Монгол Улсын тэргүүн шадар сайд Н.Алтанхуяг, Улсын бүртгэлийн ерөнхий газрын дарга Л.Мөнхбаатар нар үг хэлсэн юм. Энэхүү зөвлөгөөнөөр бүртгэлийн байгууллагаас дэвшүүлсэн зорилго, зорилт энэ жилийн арга хэмжээний биелэлтийг дүгнэж алдаа оноогоо ярилцах, цаашид хийх ажил болон авч хэрэгжүүлэх арга хэмжээг төлөвлөн зөвлөлдөхийн дээр 2010 онд УБЕГ хийсэн ажлын vр дvнгийн тайлан, судалгаа дvгнэлтээ танилцуулан мэдээлж буй юм. Мөн ирэх оны зорилт зорилгоо 21 аймаг, нийслэл, дүүргийн удирдлагуудтай хамтран хэлэлцэж санал бодлоо солилцохын дээр Улсын бүртгэлийн хэлтсийн дарга нарын 2010 оны үр дүнгийн гэрээг дүгнэж, Төсвийн ерөнхий менежертэй үр дүнгийн гэрээ байгуулах зэрэг арга хэмжээ болно. Тус газар Монгол Улсад бүртгэл, мэдээллийн нэгдсэн тогтолцоог бий болгох үндэсний хөтөлбөр, Монгол Улсын эдийн засаг, нийгмийг 2010 онд хөгжүүүлэх үндсэн чиглэл болон Монгол Улсын Засгийн газрын 2008-2012 оны үйл ажиллагааны мөрийн хөтөлбөрийн хэрэгжилтийг хангах ажлын хүрээнд 2010 онд томоохон зорилтуудыг дэвшүүлэн тавьж, хийхээр төлөвлөсөн ажил, арга хэмжээг бүрэн хэрэгжүүлэн ажилласан байна. Үүний нэг нь Монгол Улсад анх удаа иргэний биеийн давхцахгүй өгөгдөлд суурилсан мэдээллийн санг бий болгох, Монгол Улсын иргэний шинэчилсэн бүртгэлийг тогтоосон хугацаанд, амжилттай зохион байгуулж явуулах нь бүртгэлийн салбарынхны өнгөрсөн оны нэн тэргүүний зорилт байсан бөгөөд үүнийгээ ч энэ үеэр онцлон хэлэлцэж, дүгнэсэн нь өмнөх зөвлөлгөөний нэг хэсэг болох томоохон чухал ач холбогдолтой ажил үр дүнтэй хэрэгжсэн гэж үзсэн. Өнөөдрийн байдлаар Монгол Улсын хэмжээнд 16-аас дээш насны иргэдийн 93.4 хувь буюу 1.769.701 иргэн бүртгэлд хамрагдсан нь энэхүү томоохон ажлыг хэрхэн үр дүнтэй явагдсаныг илтгэж буй хэрэг юм. Зөвлөгөөний үеэр ерөнхий газрын дарга Л.Мөнхбаатар иргэний шинэчилсэн бүртгэлийн ажлыг бүрэн дүүрэн хэрэгжүүлэхийн тулд гадаадад ажиллаж амьдарж байгаа монгол иргэдээ шинэчилсэн бүртгэлд хамруулах нэн чухал байгааг онцолж, эдгээр иргэдийг бүртгэлд хамруулахын тулд тодорхой ажлуудыг хийж төлөвлөсөн тухай хэлж байсан. Тэрээр мөн 2011 онд улсын бүртгэлийн байгууллагын шинэчлэлд тодорхой ахиц гаргахаар томоохон тодорхой ажлууд төлөвлөсөн. Энэхүү үйл ажиллагааны гол зорилтуудын нэг иргэний шинэчилсэн бүртгэлийн үр дүнд бий болсон иргэний биеийн давхцахгүй өгөгдөлд суурилсан мэдээллийн санг үндэслэж иргэдийг «Цахим иргэний үнэмлэх»-тэй болгох арга хэмжээг Засгийн газрын 2008-2012 оны үйл ажиллагааны хөтөлбөр, Эдийн засаг, нийгмийг энэ онд үнд чиглэл зэрэг баримт бичгүүдэд тусгагдсаны дагуу энэ онд авч хэрэгжүүлэхээр төлөвлөсөн тухайгаа ярьсан юм. Улсын бүртгэлийн салбарын орон нутгийн удирдах ажилтны зөвлөгөөнд Улсын бүртгэлийн ерөнхий газар, нийслэлийн бүртгэлийн газрын удирдах ажилтнууд, хөдөө орон нутгийн нийт 50 гаруй албан тушаалтан оролцож байна. Улсын бүртгэлийн байгууллагын удирдах ажилтны зөвлөгөөн маргааш өндөрлөнө.