Улсын бүртгэлийн ерөнхий газар Монголын мянганы сорилтын сангийн Хөрөнгийн эрхийн төсөл хамтран “Эд хөрөнгийн эрхийн бүртгэлийн үйл ажиллагааг боловсронгүй болгох чиг хандлага” сэдэвт семинарыг энэ сарын 19-20-ны өдрүүдэд зохион байгууллаа.
Уг семинарт Улсын Бүртгэлийн Ерөнхий газрын дарга Л.Мөнхбаатар тэргүүтэй удирдлага, Монголын Мянганы Сорилтын Сангийн Гүйцэтгэх Захирал С.Баярбаатар, Мянганы Сорилтын Корпорацийн Суурин Төлөөлөгч Роберт Рийд мөн төрийн байгууллагуудын төлөөллүүд оролцлоо. Тус семинараар эд хөрөнгийн эрхийн бүртгэлийн эрх зүйн орчин, онол практикийн арга зүй, мэдээллийн технологийн болон хөрөнгийн эрхийн төслийн үйл ажиллагаа, түүний хэрэгжилтийн явц, цаашдын зорилтын тухай танилцуулах, мөн эд хөрөнгийн эрхийн бүртгэлийн талаар ярилцаж санал солилцож, хэлэлцүүлэг өрнүүлсэн юм. АНУ-ын Мянганы сорилтын корпорациас олгож буй 285 сая ам.долларын санхүүжилтийн 17,2 сая ам.долларыг тус төслийн үйл ажиллагааг хэрэгжүүлэхэд зарцуулж буй бөгөөд төслийн үйл ажиллагааны нэг чухал хэсэг болох УБЕГ-ын эд хөрөнгийн эрхийн бүртгэлийн газрын байр, мэдээллийн технологи, бизнесийн үйл ажиллагааг сайжруулах чиглэлээр төслийн зүгээс чухал ач холбогдол өгч байгаа билээ.
ХӨРӨНГИЙН ЭРХИЙН ТӨСЛИЙН ТАЛААР ТОВЧ.....
“Монгол Улсын иргэнд газар өмчлүүлэх тухай” хууль гарсанаар иргэд гэр бүлийн хэрэгцээндээ газар өмчлөх хууль зүйн үндэс бүрдсэн билээ. Өмчилсөн газраа эдийн засгийн эргэлтэнд оруулсанаар ядуурлыг бууруулах, амьжиргааны түвшинг дээшлүүлэхэд дэмжлэг болно. Гэхдээ хуулийн хэрэгжилтийг хангахад нилээдгүй саад, хүндрэл тулгарч байгаа юм. Хөрөнгийн Эрхийн Төслийн хүрээнд газар өмчлөл, бүртгэлтэй холбоотой асуудлаар төрийн байгууллагуудын зүгээс иргэдэд үзүүлэх үйлчилгээний чанарыг сайжруулах, үйлчилгээ үзүүлэх орчин, техник хэрэгслийн чадавхийг нэмэгдүүлэх, кадастрын зургийн нарийвчлалыг сайжруулах, газар өмчлөл, бүртгэлийн талаарх иргэдийн мэдлэгийг дээшлүүлэх замаар газрыг эдийн засгийн эргэлтэнд оруулахад саад болж буй хүндрэлийг багасгаж арилгах чухал ач холбогдолтой. Төсөл нь Улаанбаатар хот түүний дүүргүүд, бүсийн 8 тулгуур төвүүдэд хэрэгжих бөгөөд гэр хорооллын иргэд, хөрөнгийн эрхийн бүртгэл болон газрын асуудал эрхэлсэн Засгийн газрын бүтцийн байгууллагуудыг хамаарна. Хөрөнгийн эрхийн төслийн үр дүнд ойролцоогоор гэр хорооллын 75 мянган өрх хашааны газраа өмчлөх эрхээ бүртгүүлэн, газрын зах зээлийн харилцаанд орох боломжтой болно. Мөн хөрөнгийн бүртгэлд гарсан дэвшил, үл хөдлөх хөрөнгийн зах зээл, банк санхүүгийн байгууллагын үйл ажиллагаанд дам нөлөөлж, иргэд үр шимийг хүртэнэ.
