Улсын бүртгэлийн ерөнхий газар, АНУ-ын Азийн сан хооронд хамтран авлигаас урьдчилан сэргийлэх үйл ажиллагааны төлөвлөгөөг хэрэгжүүлэхэд дэмжлэг үзүүлэх, авилга, хүнд суртал, үйлчилгээний шат дамжлагыг багасгах, бүртгэлийн үйлчилгээг шуурхай болгоход чиглэсэн ажлуудыг хамтарч хийж гүйцэтгэхээр тохиролцон санамж бичиг байгуулсан билээ.

Тэгвэл энэ хүрээнд өнөөдөр АНУ-ын Азийн сан, УБЕГ хамтран «Авлига, хүн худалдаалах гэмт хэргээс урьдчилан сэргийлэх» сэдэвт сургалтыг Кемпинский зочид буудалд зохион явуулав. Сургалтын зорилго нь төрийн үйлчилгээний чанар, хүртээмжийг сайжруулах, төрийн үйлчилгээг иргэдэд түргэн шуурхай, чирэгдэлгүй хүргэх, төрийн албан хаагчид авлига, хүнд суртал, хүн худалдаалах гэмт хэрэг, үйлчилгээний хүнд суртал бий болох нөхцлийг бүрдүүлснээр иргэний эрх зөрчигдөх, шударга, ёс зүйгүй байдал гаргах, улмаар төрийн албаны нэр хүнд унахаас урьдчилан сэргийлэх, үүссэн нөхцөл байдлыг таслан зогсооход оршиж байгаа юм. Энэ үеэр Хүйсийн тэгш эрхийн төвийн тэргүүн Г.Ганбаясгах «Хүн худалдаалах гэмт хэргийн өнөөгийн нөхцөл байдал ба итгэлийн утас 19-03» , Хүүхэд эмэгтэйчүүдийн халамж хамгаалал ТББ-ын тэргүүн Ц.Өнөрцэцэг «ХХГХ-ээс урьдчилан сэргийлэх, хамгаалах. Мэдээлэл түгээх арга барил. паспортын хавчуурга» сэдвээр лекц уншсанаас гадна төрийн болон төрийн бус байгууллагын төлөөлөгч нар сургалтын сэдвийн хүрээнд лекц уншсан. «Авлига, хүн худалдаалах гэмт хэргээс урьдчилан сэргийлэх» сэдэвт сургалтанд УБЕГ-ын иргэний бүртгэлийн болон хуулийн этгээдийн улсын бүртгэгч, архивын мэргэжилтнүүд зэрэг 60 гаруй албан хаагчид, зарим удирдлагууд оролцов.