Тус газрын харъяа Эд хөрөнгө, хуулийн этгээд, иргэний бүртгэл, Нийслэлийн бүртгэлийн газар болон бусад нэгж, тасгууд энэ сарын 16-ний өдрийн Бямба гарагт ээлжит Нээлттэй өдөрлөгөө тус тус байрандаа зохион байгуулж, явуулах гэж байна.

Уг өдрийн арга хэмжээг Эд хөрөнгийн эрхийн бүртгэлийн газар “Газар өмчлөх эрхийн бүртгэл” сэдвийн хүрээнд явуулна. Үүний дагуу тус өдөр иргэд олон нийтэд газар өмчлөх эрхээ улсын бүртгэлд бүртгүүлэхэд бүрдүүлдэг баримт бичиг, түүнийгээ улсын бүртгэлд бүртгүүлэхийн ач холбогдол, эдийн засгийн эргэлтэд хэрхэн яаж оруулах, бүртгэлд оруулсны үр дүн, гарч болох зөрчлүүд, тэдгээрийг арилгах арга замуудын талаар нарийвчилсан заавар, зөвлөгөө өгнө. Мөн иргэдийн газар өмчлөх эрхээ улсын бүртгэлд бүртгүүлэхээр гаргасан мэдүүлгийг хүлээн авах, бүртгэл хийж, үл хөдлөх эд хөрөнгийн гэрчилгээ олгох үйлчилгээг нэг цэгээс хүргэнэ. Түүнчлэн архивын бүх төрлийн лавлагаа олгох, гадаад паспортын материал хүлээн авах, хүчинтэй хугацааг сунгах, хуулийн этгээдийн үүсгэн байгуулах баримт бичгийн жагсаалт хүлээн авах, бүртгэх зэрэг тус газраас ажлын өдөр иргэдэд үзүүлж, олгодог бүхий л төрлийн үйлчилгээг үзүүлэх юм. Иймд иргэд та бүхэн тус газрын харъяа Эд хөрөнгийн эрхийн бүртгэлийн газар, Иргэний бүртгэлийн газар, Хуулийн этгээдийн бүртгэлийн газар, бусад нэгж, тасагт өргөнөөр ирж үйлчлүүлнэ үү.