Улсын бүртгэлийн ерөнхий газар сар бүрийн 2 дахь долоо хоногт Нээлттэй хаалганы өдрийг тогтмол зохион байгуулж хэвшүүлсээр ирсэн билээ.

Тэгвэл тус газрын харъяа Иргэний бүртгэлийн газар, Эд хөрөнгийн эрхийн бүртгэлийн газар, Хуулийн этгээдийн бүртгэлийн газар, нэгж, тасгууд бүгд энэ амралтын өдөр ажиллаж, бүтэн өдрийн турш иргэдийн санал гомдлыг сонсож, заавар зөвлөгөө өгч хуулийн этгээд, эд хөрөнгө, иргэний бүртгэл, архивтай холбоотой бүхий л төрлийн үйлчилгээг нэг цэгт хүргэж ажиллалаа. Тус газар Нээлттэй хаалганы өдрөөр Нэг шинэ үйлчилгээ гэсэн уриатайгаар үйлчилгээгээ иргэдэд хүргэдэг. Үүнтэй холбоотойгоор энэ удаагийн Нээлттэй өдөрлөгийн онцлог гэвэл иргэдийн цаг завыг хөнгөвчлөх зорилгоор дүүрэгт бичиж олгодог төрсний гэрчилгээг архиваас авсан лавлагааг нь үндэслэн шинэ төрсний гэрчилгээг газар дээр нь шуурхай бичиж олгосон. Ээлжит уг арга хэмжээг тус газрын Бүртгэлийн хяналтын газраас зохион байгуулсан бөгөөд ерөнхий газрын хэмжээнд нийт 1000 гаруй хүнд хэрэгтэй мэдээллийг нь өгч, бүртгэлийн бүхий л төрлийн үйлчилгээг үзүүлсэн. Тухайлбал Иргэний гэр бүлийн байдлын төрсний, үрчилсний, овог нэр нэр өөрчилсний, гэрлэсэн болон гэрлэлт цуцалсны зэрэг 8-н төрлийн архивын лавлагаа, хүүхдийн хавсралт үнэмлэх олгож, гадаад паспорт , түүний хүчинтэй хугацааг сунган, хориг тавих, иргэний бүртгэлд мэдээлэл нь ороогүй иргэдийг мэдээллийн санд оруулж, баримт бичгийн зөрчилтэй иргэний асуудлыг хуулийн дагуу шийдвэрлэх, түүнчлэн эд хөрөнгө буюу үл хөдлөх, хуулийн этгээдийн бүртгэл зэрэг ажлын өдрүүдэд үзүүлдэг бүх л үйлчилгээг хүргэж ажиллав.