2010 оныг “Бизнесийн орчны шинэтгэлийн жил “ болгох тухай Монгол Улсын Засгийн газрын 2009 оны 377 дугаар тогтоолыг хэрэгжүүлэх арга хэмжээний төлөвлөгөөний дагуу бүртгэлийн шинэтгэлийн үйл ажиллагааны ажлын явц, үр дүнтэй танилцах уулзалт өнөөдөр зохион байгуулагдав.
Уг уулзалтад Ерөнхий сайд, Шадар сайдын ажлын алба, Засгийн газрын хэрэг эрхлэх газар, Үндэсний хөгжил, шинэтгэлийн хороо, Олон Улсын байгууллага, элчин сайдын яамд болон мэргэжлийн холбоод, төрийн бус байгууллагууд, олон нийтийн хэвлэл мэдээллийн байгууллагуудын төлөөлөл оролцсон юм. Улсын бүртгэлийн ерөнхий газар “Бизнесийн орчны шинэтгэлийн жил”-ийн хүрээнд Бизнес эрхлэх орчныг сайжруулахад чиглэсэн “Бизнес эхлэх” үйл ажиллагааг хөнгөвчлөх зорилгоор иргэн, хуулийн этгээд, эд хөрөнгийн эрхийн бүртгэлийн үйл ажиллагааг нэг цэгийн үйлчилгээнд шилжүүлж, үйлчилгээний шат дамжлаг, чанар хүртгээмжийг сайжруулах, нээлттэй байдлыг бий болгох улмаар иргэдэд баримт бичиг олгох цаг хугацааг багасган, төлбөр, хураамжийг бууруулж, онлайнаар хуулийн этгээдийн нэр, лавлагаа мэдээлэл өгдөг болсон зэрэг тодорхой ажлуудыг үе шаттайгаар авч хэрэгжүүлээд байна. Тухайлбал: “Улсын бүртгэлийн ерөнхий газраас иргэн аж, ахуй нэгж, байгууллагад үзүүлэх үйлчилгээнд тавих шаардлага” /Байгууллагын үйлчилгээний стандарт –CS11-0063: 2009/-ыг “Монгол Улсын үндэсний стандартчилал”-ын MNS 1-2: 2006 шүүлтийн дагуу батлан мөрдөж хэвшүүлээд байна. Мөн ажлын цагийн зохицуулалт хийхийн зэрэгцээ үйлчилгээг түргэн шуурхай, тасралтгүй хүргэх зорилгоор “Дотоод ажлын өдөр”-гүй болгож, цайны цагийг ээлжийн хуваарь гарган зохион байгуулж, ажлын өдөр 09.00-18.00 цагийн хооронд буюу 9 цаг тасралтгүй иргэдэд үйлчилж байна. Түүнчлэн Эд хөрөнгө, хуулийн этгээдийн үйлчилгээний шинэ танхимыг ашиглалтад оруулж, үйлчилгээний 14 цонхыг шинээр нэмж үйлчлүүлэгчид тав тухтай орчинд үйлчилгээ авах нөхцлийг бүрдүүлэн, өнгөний систем нэвтрүүлж, үйлчилгээний танхимд орчин үеийн техник, технологийг ашиглан бүртгэлийн мэдээлэл агуулсан цахим дэлгэц суурилуулан, иргэнд гадаад паспортыг нь бэлэн болсон тухай мессежээр илгээдэг болсон. Ингэснээр иргэдэд учирдаг оочер дарааллыг багасгасахын дээр иргэн гадаад паспортаа гарсан эсэхийг улсын бүртгэгчээс ирж асуун дараалал үүсгэх, бүртгэлийн байгууллага руу олон дахин ирэх явдлыг арилгаад байгаа билээ. Үүний зэрэгцээ байгууллагынхаа веб сайтыг шинэчлэн түүгээр иргэдийн санал гомдлыг хүлээн авахын зэрэгцээ бүртгэлтийн нэгдсэн лавлах 1890 дугаараар иргэн, хуулийн этгээд, эд хөрөнгийн чиглэлийн бүртгэлтэй холбоотой бүхий л зөвлөгөө, мэдээллийг цогцоор нь нэг дор хүргэж үйлчилгээ үзүүлж байгаагаас гадна улсын бүртгэгчийн үйл ажиллагаа, ёс зүйн асуудалтай холбоотой иргэдийн гомдлыг хүлээн авч шийдвэрлэх зорилгоор “Иргэнд ээлтэй утас 222” ажиллуулах зэрэг нилээдгүй арга хэмжээ авч хэрэгжүүлээд байгаа юм. Мөн “Нээлттэй хаалганы өдөр-”ийг сар бүрийн 2 дахь долоо хоногийн Бямба гарагт тогтмол зохион байгуулж энэ өдөр “Нэг шинэ үйлчилгээ” гэсэн уриаг дэвшүүлэн хэрэгжүүлж байна. Эд хөрөнгийн эрхийн бүртгэлийн үйлчилгээний болон бусад төлбөр, хураамжийг бэлнээр хурааж, үйлчлүүлэгчдийн бөөгнөрөл үүсгэж байсныг зогсоож, мөнгө тушаах бүх үйлчилгээг банкаар хийх тогтолцоонд шилжүүлээд байна. Цаашид лавлагаа авах төлбөрийг цахим машинаар авдаг системд шилжүүлэхээр төлөвлөөд байна.
