Иргэний шинэчилсэн бүртгэл эхэлснээс хойш тус газрын Иргэний баримтын архив төрсний бүртгэлийн лавлагаа авах гэсэн иргэдийн хөл хөдөлгөөнд дарагдсаар байна. Оочер дарааллыг цэгцэлж, үйлчилгээний ачааллыг тэнцвэржүүлэх зорилгоор дугаар, төрсний бүртгэлийн лавлагааны мэдүүлгийн хуудсыг иргэдэд тарааж эхэлсэн.

Гэсэн хэдий ч иргэд маань хуудсаа асуултын дагуу үнэн зөв бөглөөгүйгээс архиваас лавлагаа нь гарахгүй байх тохиолдол нилээд байна. Иймээс та төрсний бүртгэлийн лавлагааны мэдүүлгийн хуудсаа үнэн зөв бөглөхөөс гадна эргэж холбоо барих утасны дугаараа заавал бичиж үлдээх хэрэгтэй. Таны лавлагаа өдөртөө гараагүй тохиолдолд бид таны мэдүүлгийн хуудсыг авч үлдэнэ гэдгийг хэлье. Өөрөөр хэлбэл архивын ажилтнууд маань өдөр шөнийн ээлжээр уртасгасан цагаар ажиллаж байгаа бөгөөд шөнийн ээлжинд гарч буй ажилтнууд архиваас эрэл хайгуул хийх юм. Иймд архивын ажилтан таныг буцаж ирүүлэхээр хугацаа зааж явуулсан бол та лавлагаагаа гарсан үгүйг мэдэхийн тулд заавал ирэх шаардлагагүй. Учир нь манайх Таны цаг завыг хэмнэж, ажлыг тань хөнгөвчлөх зорилгоор шинэ үйлчилгээ нэвтрүүлсэн байгаа. Энэ нь бүртгэлийн нэгдсэн лавлах 1890 дугаар болон уг сайтын 1890 онлайн лавлахаар операторуудтай шууд холбогдож өөрийн “регистрийн дугаар”-аа хэлснээр лавлагаагаа гарсан эсэхийг мэдэх бүрэн боломжтой боллоо гэсэн үг юм.