Шинэчилсэн бүртгэлийн ажил эхэлсэнтэй холбоотойгоор Улсын бүртгэлийн ерөнхий газрын Иргэний баримтын архивын ачаалал өнөөдрийн байдлаар 5 дахин ихсээд байна. Өөрөөр хэлбэл төрсний гэрчилгээгээ гээсэн, үрэгдүүлсэн, хүчингүй болгосон гэсэн иргэд төрсний гэрчилгээний лавлагаа авхаар оочер дараалал үүсгээд байна.

Иргэний баримтын архив өмнө нь өдөрт дунджаар 200-300 иргэнд иргэний гэр бүлийн 8 төрлийн архивын лавлагаа олгож үйлчилдэг байсан бол одоогийн байдлаар шинэчилсэн бүртгэл эхэлснээс хойш өдөрт дунджаар 800-1200 гаруй иргэнд энэ төрлийн үйлчилгээг үзүүлж байна. Архиваас лавлагаа авахаар ирсэн эдгээр иргэдийн 90 хувь төрөлтийн бүртгэлийн лавлагаа авч байгаа юм. Иймд ачаалал ихэссэнтэй холбогдуулж тус газар боломж бололцоогоороо хүн хүчээ нэмэгдүүлэн, иргэдэд үзүүлэх үйлчилгээний шат дамжлагыг багасгах зорилгоор өглөөний 8.00-22.00, 22.00-8.00 хүртэл 2 ээлжээр уртасгасан цагаар, нийт 40-50 орчим гэрээт ажилтан нэмж авч, үйлчилгээний цонхны ажилтан бүрт нэг нэг хүн нэмж ажиллуулж байна. Түннчлэн архивын үйлчилгээний цонхны тоог нэмэгдүүлж 16 болгон, иргэдэд дугаар болон төрсний бүртгэлийн лавлагааны мэдүүлгийн хуудас зэргийг тарааж өгөх зэрэг арга хэмжээ аваад байна.