Иргэний шинэчилсэн бүртгэлийн нээлтийг өчигдөр Төрийн ордонд хийв.Энэ үеэр Ерөнхий сайд С.Батболд, тэргүүн шадар сайд Н.Алтанхуяг нар шинэчилсэн бүртгэлээр бүртгүүлсэн юм. Ингээд иргэний шинэчилсэн бүртгэл орон даяар эхэлж байгаа юм байна.

Бүртгэлд Монгол Улсын 16-гаас дээш насны иргэн өөрийн иргэний үнэмлэх, төрсний гэрчилгээтэйгээ өөрийн харьяа сум, хороондоо очиж цээж зураг болон хурууны хээгээ өгөх юм байна. Харин 16 нас хүрээгүй хүүхдийг эцэг эх, асран хамгаалагч хариуцан бүртгэлд хамруулах аж. Шинэчилсэн бүртгэлээр Монгол Улсын иргэдийг хамруулснаар “Хүний хөгжил сан”-гийн хишиг, хувь болон байгалийн баялгаас олох ашгаа иргэддээ тэгш хүртээх асуудлыг шийдэж байгаа юм. Өөрөөр хэлбэл, иргэдээ шинээр бүртгэлжүүлснээр УИХ-аар хэлэлцэж байгаа Таван толгойн хувьцааны 10 хувийг ард түмэнд тараах нөхцөл бүрдэж буй. Энэ тухай Ерөнхий сайд хэлсэн үгэндээ “Төрөөс иргэд байгууллагад үзүүлэх үйлчилгээг хүртээмжтэй, шуурхай, үр ашигтай, бодитой, тэгш, шударга хүргэх нөхцөлийг бүрдүүлэх, байгууллага хоорондын уялдаа холбоог сайжруулах, иргэний эрхийг хамгаалах, үндэсий аюулгүй байдлыг хангах, “Хөгжилтэй улс орон, Бүтээгч ард түмэн” болох үзэл баримтлалын үндэс суурийг бэхжүүлэхэд “Иргэний шинэчилсэн бүртгэл” чухал ач холбогдолтой ” хэмээж байв.Мөн Монгол Улсын иргэний бүртгэлийн давхардал, зөрчлийг арилгах зорилгоор иргэний ухаалаг үнэмлэх олгох суурь дэд бүтэц, иргэний биеийн өгөгдөлд суурилсан мэдээллийн нэгдсэн сан бий болгохыг УИХ-аас Засгийн газарт даалгаад байсан юм. Үүний дагуу эхний ээлжинд энэхүү шинэчилсэн бүртгэлийг хийж байгаа аж.

Өдрийн сонин