Засгийн газрын хэрэгжүүлэгч агентлаг Улсын бүртгэлийн ерөнхий газар нь Компанийн бүртгэлийн холбоо Олон улсын байгууллагад /CRF/-д шинээр гишүүнээр элслээ. Тус байгууллага нь бизнесийн байгууллагын захиргааны удирдлага, үнэт цаасны бүртгэлийн чиглэлээр үйл ажиллагаа явуулдаг бөгөөд бүртгэлийн системийн аюулгүй байдал, түүнийг боловсронгуй болгох үйл ажиллагааг цэгцлэх зорилго бүхий ашгийн төлөө бус олон улсын байгууллага юм.

Компанийн бүртгэлийн холбоо Олон улсын байгууллага нь анх 2003 оны 2 дугаар сарын 26-28-нд Шинэ Зеландын Окланд хотод 13 орны бүрэлдэхүүнтэй байгуулагдаж байсан бол эдүгээ Австрали, Канад, Шинэ Зеланд, Энэтхэг зэрэг мэдээллийн технологи өндөр хөгжсөн 40 гаруй орныг эгнээндээ нэгтгэсэн олон улсын томоохон байгууллага болсон байна. Холбооны үйл ажиллагааны зорилго нь гишүүн орнууд хоорондоо бүртгэлийн системийн талаар харилцан туршлага судлаж, мэдээллээ хуваалцах, /www.CRF/-ийн вэб сайтаар дамжуулан цахим сүлжээний ярилцлагад оролцож, форумын гишүүдээс суралцах, бусад бүртгэлийн газруудын менежерүүдтэй сүлжээгээр холбоо тогтоох боломжтой юм. Манай Улсын бүртгэлийн байгууллага уг холбооны гишүүн болсоноор олон улсын мэргэжлийн бүртгэлийн сүлжээнд холбогдох, холбооноос зохион байгуулж байгаа төсөл хөтөлбөр, арга хэмжээнд хамрагдах, бусад улсын бүртгэлийн байгууллагуудтай холбоо тогтоох бүрэн боломж нээгдэж цаашлаад дэлхийн жишигт нийцсэн бүртгэлийн байгууллага болох үүд хаалгыг нээж өгч байгаагаараа ач холбогдолтой юм.