Тус газрын харъяа Иргэний бүртгэл, Эд хөрөнгийн эрхийн бүртгэлийн газар, Хуулийн этгээдийн бүртгэлийн газар, хэлтсүүд энэ сарын 12-ны өдрийн Бямба гаригт ээлжит “Нээлттэй хаалганы өдөр”-өө тус тусын байрандаа зохион явуулах гэж байна.

Энэ удаагийн ээлжит уг арга хэмжээг Эд хөрөнгийн эрхийн бүртгэлийн газар зохион байгуулж, явуулна. Та энэ өдөр иргэний, үл хөдлөх хөрөнгө, хуулийн этгээдийн бүртгэлтэй холбоотой бүх төрлийн үйлчилгээ, архивын лавлагаа авах юм. Газар, бусад үл хөдлөх хөрөнгө, хөдлөх хөрөнгийн анхны, өмчлөгч өөрчлөгдөх, барьцаа, түрээсийн гэрээ бүртгэх, гэрээ цуцлах, мөн түүнчлэн шинээр болон хуулийн этгээдийн нэр олгох, баталгаажуулах, үүсгэн байгуулсан баримт бичиг болон улсын бүртгэлийн жагсаалтад оруулсан өөрчлөлт, татан буугдсан хуулийн этгээдийг бүртгэх, улсын бүртгэлийн жагсаалтаас хасах, гадаад паспорт , түүний хүчинтэй хугацааг сунгах, хориг тавих, хүчингүй болгох, хүүхдийн хавсралт үнэмлэх шинээр олгох, иргэний гэр бүлийн 8 төрлийн болон үл хөдлөх хөрөнгө, хуулийн этгээдийн бүртгэлтэй холбогдсон архивын лавлагаа олгох зэрэг ажлын өдрүүдэд үзүүлдэг бүхий л үйлчилгээгээ өөр өөрийн байрандаа нэг цэгт хүргэж үйлчилнэ. Мөн газар, хэлтсийн мэргэжилтнүүд дээрхтэй холбоотой асуудлаар мэргэжил арга зүйн зөвлөгөө өгч, таны өргөдөл гомдол, санал хүсэлтийг амаар болон бичгээр, утсаар, онлайнаар авч асуудлыг зохих журмын дагуу шийдвэрлэж ажиллана. Манай байгууллагын үйл ажиллагаа, үйлчилгээтэй холбоотой санал хүсэлтээ www.registrationmongolia.com сайтад үлдээж болно. Түүнчлэн бүртгэлийн талаарх холбогдох бүх төрлийн мэдээллийг “1890” дугаараас энгийн утасны тарифаар авах боломжтой.