Улсын бүртгэлийн нэгдсэн сүлжээнд сум, хороодыг бүрэн холбох төсөл амжилттай хэрэгжиж байгаа талаар Улсын Бүртгэлийн Ерөнхий газар, Азийн хөгжлийн банкнаас өнөөдөр мэдээлэл хийлээ. Тус газар нь Азийн хөгжлийн банкны дэмжлэгтэйгээр “Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох” төслийг 2018 оны 02 дугаар сараас хэрэгжүүлж эхэлсэн. Төслийн хүрээнд 2018 онд 12 аймгийн 39 сум, хоёр дүүргийн 11 хороог улсын бүртгэлийн онлайн сүлжээнд холбоод байна.
Хэвлэлийн хурлын үеэр Улсын бүртгэлийн ерөнхий газрын дарга Б.Баасандорж “Улсын бүртгэл цэвэр үйлчилгээний байгууллага. Хүн төрөхөөсөө насан эцэс болтлоо 81 төрлийн бүртгэлийн үйлчилгээг авч байна. Мөн улсын хэмжээнд 43 лавлагаа мэдээллийн үйлчилгээгээр иргэдээ хангаж үйлчилдэг байгууллага. Өнгөрсөн онд Улсын бүртгэлийн тухай багц хууль хэрэгжиж эхэлсэн байгаа. Хэрэгжиж байгаа хуулийн гол үзэл баримтлал иргэн рүү чиглэсэн үйлчилгээг сайжруулах.Тиймээс энэхүү төслийг Азийн хөгжлийн банктай хамртан амжилттай хэрэгжүүлж байна.Ингэснээр улсын бүртгэлийн үйлчилгээг иргэдэд ойртуулахаас гадна цаг хугацаа, хөрөнгө мөнгийг хэмнэх боломжтой” гэдгийг дурдлаа. 
Азийн хөгжлийн банкны Монгол дахь захирал, Суурин төлөөлөгч Ёланда Фернандез Ломмен “Монгол Улс нь нийгмийн хамгааллын чиглэлд бусад орноос харьцангуй өгөөмөр. Төрөөс нийгмийн хамгаалал, халамжид нэлээд мөнгө зарцуулдаг. Энэ мөнгө нь нүдээ олохгүй зүйлд зарцуулагдвал маш харамсалтай. Энэ үйлчилгээ нь нүдээ олсон, эзэндээ очсон үйлдэл тул бид энэ төслийг хэрэгжүүлсэн. Сум, хороодыг улсын бүртгэлийн онлайн сүлжээнд амжилттай холбож байгаад баяртай байна. Иргэд аймаг, дүүргээс улсын бүртгэлийн үйлчилгээг авахад хол зам туулж, зардал их гардаг. Төслийн хүрээнд холбогдсон 39 сум, 11 хороодын иргэд иргэний улсын бүртгэлийн үйлчилгээг шууд авах боломж бүрдэж байна. Энэхүү ажлын дүнг чухалчлан үзэж төслийн хүрээнд 2019 онд 120 сумыг нэмж холбохоор санхүүжилтийг нь шийдэж өгөхөөр болсонд баяртай байна” гэв.
Өмнө нь тухайн сум, хороодын иргэд улсын бүртгэлийн зарим үйлчилгээг авахын тулд аймгийн төв, дүүрэг ороход дунджаар 2-290 км зам туулж, унаа, хоол, байр, бусад зардалд 1000-250.000 орчим төгрөг зарцуулдаг байсан. Тэгвэл 2019 онд үргэлжлүүлэн 120 сумыг үе шаттайгаар бүрэн холбох бөгөөд онлайн сүлжээний тусламжтайгаар цаг хугацаа, эдийн засгаа хэмнэх олон давуу талтай болж байгаа юм. Тодруулбал иргэд өмнө нь иргэний бүртгэлийн зарим лавлагаа, үйлчилгээг зөвхөн аймгийн төв болон харъяалах дүүргээсээ авдаг байсан бол одоо онлайн сүлжээний тусламжтайгаар харъяалал харгалзахгүйгээр шууд сум/хорооноосоо авах боломж бүрдэж байгаа юм. Ингэснээр бүртгэлийн үйлчилгээг иргэдэд шуурхай, чирэгдэлгүй хүргээд зогсохгүй иргэдийн хувьд цаг хугацаа, эдийн засгийг хэмнэх олон давуу талтай. Сумдыг улсын бүртгэлийн онлайн сүлжээнд холбох нь зөвхөн иргэдэд төдийгүй тухайн сум, орон нутагт үйл ажиллагаа явуулж буй төрийн захиргааны болон хувийн хэвшлийн байгууллагуудад ихээхэн хамааралтай бөгөөд аюулгүй байдал хангагдах чухал ач холбогдолтой. “Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох” төслийг амжилттай хэрэгжүүлэхэд Монгол Улсын Засгийн газар, Мэдээлэл холбооны сүлжээ ТӨК, аймаг, сумын удирдлагууд бүх талын дэмжлэг үзүүлэхээр хамтран ажиллаж байна. Улсын бүртгэлийн мэдээллийн сангийн оновчтой байдлыг сайжруулах, бүртгэлийн мэдээллийн сан хоорондын зөрүүтэй байдлыг арилгах, тоног төхөөрөмж, дэд бүтцийг сайжруулах, төрийн албан хаагчдын чадавхийг бэхжүүлэх замаар Засгийн газраас дэвшүүлсэн “Нэг иргэн-нэг бүртгэл” хөтөлбөрийг хэрэгжүүлэхэд туслалцаа үзүүлэх зорилтын хүрээнд дээрх төслийг ийнхүү хэрэгжүүлж байгаа билээ.
