УБЕГ-ын дарга Б.Баасандорж өнөөдөр Дэлхийн банкны ахлах эдийн засагч ноён Петер Силарзкигаар ахлуулсан багийн хамт олныг хүлээн авч уулзлаа. Уулзалтын үеэр УБЕГ-ын дарга Дэлхийн банкны дэмжлэгтэйгээр эд хөрөнгийн эрхийн бүртгэлийн системийг цахимжуулах “Ухаалаг засаг” төслийн дэд бүрэлдэхүүн хэсгийг хэрэгжүүлэхэд хамтран ажилласан Дэлхийн банк, Монгол Улсын Засгийн газар, Төслийн баг хамт олонд талархсанаа илэрхийлээд энэхүү төсөл хэрэгжиж дууссан боловч дараа дараагийн хамтран ажиллах боломжтой төслүүдийн талаар харилцан ярилцаж санал солилцов.
Дэлхийн банкны ахлах эдийн засагч ноён Петер Силарзки мөн уулзалтын үеэр “Ухаалаг засаг төслийн үр дүн, ажлын явц байдалтай өнгөрсөн 6 дугаар сард Сэлэнгэ аймгийн Сүхбаатар хотод очиж танилцсан. Төсөл амжиллтай хэрэгжсэнд сэтгэл хангалуун байгаагаа дурдаад, хэдийгээр энэ удаагийн төсөл маань амжилттай хэрэгжээд дуусч байгаа ч бид цаашид энэхүү төсөлтэй холбоотой гарах дараагийн шаардлагатай ажлууд дээр хамтарч ажиллахад таатай байх болно. Тухайлбал, уг төслийг үргэлжлүүлэн сайжруулах хүрээнд илүү боловсронгуй болгохын тулд нийслэл, орон нутгийн бүх хороо, сумд эд хөрөнгийн эрхийн бүртгэлийн шинэ цахим системд холбогдсоноор үүсэх сүлжээний ачаалал, багтаамж, чадамжийг дээшлүүлэх, мэдээллийн аюулгүй байдал зэрэг чухал асуудал дээр үргэлжлүүлэн хамтран ажиллах нь огт өөр төсөл эхлүүлснээс илүү үр дүнтэй байна” гэдгийг онцоллоо. Мөн энэ үеэр Дэлхийн банкны Мэдээлэл, харилцаа холбооны Ахлах зөвлөх ноён Сэбастиан Фоо “Сингапур улс нь өнгөрсөн онд 3 сая иргэдийнхээ эрүүл мэндийн мэдээллийг алдагдсан тухай жишээг дурдаад цахим орчинд холбогдсон тохиолдолд кибер аюулгүй байдал, аюулгүй байдлын дэд бүтцийнхээ асуудалд онцгой анхаарал хандуулах хэрэгтэй” гэдгийг зөвлөж байлаа.
Дэлхийн банкны дэмжлэгтэйгээр Улсын бүртгэлийн ерөнхий газарт хэрэгжсэн “Ухаалаг засаг” төслийн талаар товч дурдвал энэхүү төсөл хэрэгжсэнээр Монгол Улсын 21 аймаг, 9 дүүрэг болон 30 сумдад ePRS буюу эд хөрөнгийн эрхийн бүртгэлийн цахим систем нэвтэрч үйл ажиллагаагаа эхлүүлэхэд бэлэн болоод байгаа юм. Ингэснээр иргэд эд хөрөнгийн эрхийн улсын бүртгэлийн үйлчилгээг цаг хугацаа орон зайнаас үл хамааран түргэн шуурхай авах нөхцөл бүрдэнэ. Тус газар цаашид дээрх төслийн хүрээнд үргэлжлүүлэн орон нутгийн 220 сумдад тус системийг нэвтрүүлэхээр төлөвлөж байна.
Дэлхийн банкны төлөөлөгчдийг хүлээн авсан уг уулзалт найрсаг, ажил хэрэгч уур амьсгалтай болохын зэрэгцээ цаашид хамтран ажиллах боломжтой чиглэлүүдээр харилцан санал солилцсоноор үр дүнтэй болж өндөрлөлөө.
