Улсын бүртгэлийн багц хуулийн шинэчлэл арваннэгдүгээр сарын 01-нээс хүчин төгөлдөр хэрэгжиж эхэлнэ. Уг хуулийг сурталчлахтай холбогдуулан хэвлэл мэдээллийн байгууллагаар дамжуулан хуулийн талаар нэгдсэн ойлголт, мэдээлэл өгөх, шинээр батлагдсан хуулийн талаар таниулж, сурталчлах сургалт өнөөдөр боллоо. Сургалтыг нээж Улсын бүртгэлийн ерөнхий газрын дарга Б.Баасандорж үг хэлээд багц хуулийн талаар танилцуулга, мэдээлэл хийв.

Мөн энэ үеэр Хууль зүй, дотоод хэргийн яамны ХЗБГ-ын дарга П.Сайнзориг багц хуулийн талаар танилцуулга хийсэн. Тэрбээр “Энэ хууль аливаа нэг байгууллагын эрх үүргийг нэмэгдүүлэхдээ биш, иргэд рүүгээ чиглэсэн хууль юм. Иргэдийнхээ эрх үүргийг тодорхой болгосон, төрийн үйлчилгээ авах арга замыг хялбар болгосон. Эрх үүргээ мэдэж байгаа иргэн ямар ч үед дарга, цэргийн үүдийг сахихгүйгээр өөрт хэрэгтэй төрийн үйлчилгээгээ авах бололцоог бүрдүүлсэн юм. Хууль эрхзүйн орчноо боловсронгуй болгож, техник технологийн ололтыг нэвтрүүлж байна” гэлээ. Өнөөдрийн сургалтаар Улсын бүртгэлийн багц хуулинд орсон өөрчлөлт, шинэчлэлийн хүрээнд холбогдох газрын дарга нар сэтгүүлчдэд тодорхой нэгдсэн мэдээллийг өгч, тэдний сонирхсон асуултад хариулт өгснөөр сургалт өндөрлөв. Сургалтад 46 хэвлэл мэдээллийн байгууллагын 50 гаруй төлөөлөл, тус газрын холбогдох удирдлагууд оролцлоо.