Улсын бүртгэлийн багц хууль шинэчлэн батлагдсантай холбогдуулан тус газар Гэр бүл, хүүхэд, залуучуудын хөгжлийн газартай хамтран өнөөдөр холбогдох байгууллагуудтай хамтран сургалт зохион байгууллаа.

Сургалтын зорилго нь иргэний улсын бүртгэлийн тухай хуулийн шинэчилсэн найруулгын танилцуулга, асрамж, халамжийн төвүүдэд хүмүүжүүлэхээр авч байгаа хүүхдүүдийг иргэний улсын бүртгэлд бүртгэх үйл ажиллагаа, Монгол Улсын харъяат олдмол хүүхдийг гадаадын иргэн, харъяалалгүй хүнд үрчлүүлэх эрх зүйн зохицуулалт, улсын хэмжээнд үйл ажиллагаа явуулж байгаа төрийн болон төрийн бус байгууллагын асрамж халамжийн төвүүдтэй хамтын ажиллагааг өргөжүүлэх, бүртгэлгүй хүүхдийг бичиг баримтжуулах арга хэмжээний талаар салбар хоорондын уялдаа холбоог сайжруулахад оршино.

Сургалтын үеэр Иргэний улсын бүртгэлийн тухай хуулийн шинэчилсэн найруулгын танилцуулга, иргэний улсын бүртгэл хөтлөх үйл ажиллагаа /төрсний бүртгэл/, олдмол болон гадаадын иргэн, харьяалалгүй хүнд Монгол Улсын харьяат хүүхдийг үрчлүүлэх эрх зүйн зохицуулалт, иргэний овог, эцэг / эх/ -ийн нэр, өөрийн нэр өөрчлөх бүртгэл, иргэний оршин суугаа газрын хаягийн бүртгэл, биеийн давхцахгүй өгөгдлийн бүртгэл, шилжилт хөдөлгөөний бүртгэл, асрамж халамжийн төвд амьдарч байгаа хүүхдүүдийг бүртгэлжүүлэх ажлыг хамтран зохион байгуулах болон цаашид хэрэгжүүлэх сургалт, судалгаа, хамтын ажиллагааны асуудал зэрэг илтгэл, танилцуулгууд хөтөлбөрийн дагуу тавигдсан.
Иргэний улсын бүртгэлийн тухай хуулийн шинэчилсэн найруулгын хэрэгжилтийг хангах зорилгоор тавьсан дээрх илтгэл, танилцуулга, зөвлөмж нь цаг үеэ олсон, сургалтад оролцож буй албан хаагчдын нэн хэрэгцээтэй асуудалд хариулт, мэдээлэл өгсөн нь сургалтын онцлог байв.
Цаашид Иргэний улсын бүртгэлийн тухай хууль, холбогдох бусад дүрэм журмыг хэрэгжүүлэхэд гэр бүл, хүүхэд залуулчуудын асуудал хариуцсан нэгж ажилтнуудад сургалт мэдээлэл өгөх, асрамж халамжийн төвүүдэд амьдарч байгаа бичиг баримтгүй хүүхдүүдийн судалгаанд үндэслэн бичиг баримтжуулах талаар тодорхой ажлуудыг төлөвлөн хамтран зохион байгуулах нь зүйтэй гэдгийг сургалтад оролцогчид онцоллоо. Сургалтад Нийслэлийн дүүргүүдийн Гэр бүл, хүүхэд залуучуудын асуудал хариуцсан мэргэжилтэн, хууль хяналтын байгууллагын холбогдох албан хаагчид, Ерөнхий боловсролын дунд сургуулийн нийгмийн ажилтан, багш, Асрамж халамжийн төвүүдийн удирдлага зэрэг нийт 100 орчим хүн оролцов.