Олон улсын Ахмадын баярын өдрийг тохиолдуулан өнөөдөр Улсын бүртгэлийн ерөнхий газрын дарга Б.Баасандорж улсын бүртгэлийн байгууллагад ажиллаж байгаад гавьяаныхаа амралтад суусан ахмадуудыг хүлээн авч, баярын мэнд хүргэлээ.

Тэрээр хэлсэн үгэндээ Монгол Улсын бүртгэлийн салбарыг хөгжүүлж, тогтвортой бэхжүүлэхэд өөрийн хүч хөдөлмөр, залуу нас, мэдлэг чадвар, сэтгэл зүтгэлээ зориулсан ахмадуудтайгаа уулзаж байгаа нь миний хувьд нэр төрийн хэрэг гэж үзэж байна. Учир нь бүртгэлийн үйлчилгээг ард түмэндээ тасралтгүй, түргэн шуурхай үзүүлэх, төрийн албаны нэр хүнд, ёс зүй, хэм хэмжээг чанд баримтлан ажиллах үлгэр дуурайллыг Та бүхэн үзүүлж ирсэн эрхэм хүмүүс билээ. Төр засгийн зүгээс ахмад настны амьжиргаа, эрүүл мэнд, хөдөлмөр эрхлэлт, нийгмийн оролцоог болон ахмадуудад төрөөс нэмэгдэл, хөнгөлөлт олгох асуудлыг дэмжих зорилгоор холбогдох хууль тогтоомжийг баталсан. Уг хууль тогтоомжид заасны дагуу манай байгууллага улсын бүртгэлийн байгууллагад ажиллаж байсан ахмад настанд тусламж олгох, дэмжлэг үзүүлэх журмыг батлан хэрэгжүүлж байгааг онцоллоо.

Ахмадуудаа хүлээн авах хүндэтгэлийн уулзалтад 1992-1997 онд Иргэний бүртгэл, мэдээллийн улсын төвийн даргаар ажиллаж байсан хошууч генерал, гавьяат хуульч Д.Сандаг-Очир, 1999-2008 онд Иргэний бүртгэл, мэдээллийн улсын төвийн дарга, цагдаагийн хурандаа А.Энхжав болон мөн энэ онуудад тус төвийн дэд даргаар ажиллаж байсан Ж.Бат-Эрдэнэ, өндөр настан, иргэний бүртгэлийн байцаагчаар ажиллаж байсан Т.Ядам гуай зэрэг нийт 70 гаруй ахмад оролцож, уулзалтад оролцсон ахмадуудаас үг хэлж, бүртгэлийн байгууллагын удирдлага нийт хамт олонд талархал илэрхийлээд, бүртгэлийн салбарын шинэчлэлийн ажилд амжилт хүслээ.