Засгийн газраас 2018 оны тавдугаар сарын 04-ний өдөр өргөн мэдүүлсэн Улсын бүртгэлийн ерөнхий хуулийн шинэчилсэн найруулгын төсөл болон хамт өргөн мэдүүлсэн бусад хуулийн төслүүдийн үзэл баримтлалын төслийн хэлэлцүүлэг боллоо. Хэлэлцүүлэгт УИХ-ын гишүүн Ц.Мөнх-Оргил, УИХ-ын гишүүн Н.Учрал, УИХ-ын гишүүн Д.Ганболд, Хууль зүй, дотоод хэргийн дэд сайд Б.Энхбаяр, ажлын хэсгийн гишүүд, Оюуны өмч, улсын бүртгэлийн ерөнхий газрын удирдлагууд оролцов. Хуулийн төсөл болон “Нэг иргэн-Нэг бүртгэл” үндэсний хөтөлбөр, бүртгэлийн байгууллагын үйл ажиллагааны талаар Оюуны өмч, улсын бүртгэлийн ерөнхий газрын даргын үүргийг түр орлон гүйцэтгэгч Д.Дэлгэрсайхан танилцууллаа.
Бүртгэлийн байгууллагын үйл ажиллагааг түргэн, шуурхай хүртээмжтэй болгож цахимжуулах зорилгоор Засгийн газар уг хуулийн төслийг боловсруулжээ. Хуулийн төсөлд улсын бүртгэлийн нэгдсэн тогтолцоо, байгууллагын чиг үүрэг, удирдлагын бүрэн эрх, үйл ажиллагааны хяналт, иргэн, хуулийн этгээд, эд хөрөнгийн эрхийн улсын бүртгэлийн төрлүүд, мэдээллийн сантай холбоотой харилцааг зохицуулах заалтуудыг нарийвчлан тусгасан байна. Мөн иргэний хувийн мэдээллийг цахим иргэний үнэмлэхийн санах ойд тэмдэглэх, уг мэдээллийг хуулийн этгээд, эд хөрөнгийн эрхийн улсын бүртгэл хийхэд ашиглах, төрийн болон хувийн хэвшлийн байгууллагаас үйлчилгээ авах боломжтой байх зэрэг зохицуулалт тусгасныг танилцуулав.
Хуулийн төслийг баталснаар улсын бүртгэлийн цахим мэдээллийн сангийн ашиглалт, хадгалалт, хамгаалалт нарийвчилсан зохицуулалтад орох, иргэн, хуулийн этгээдийг бүртгэлийн үнэн зөв, бодитой мэдээллээр хангах зэрэг олон давуу тал бий болно хэмээн үзэж байгаа юм. Улсын бүртгэлийн ерөнхий хуулийн шинэчилсэн найруулгын төслийг 2018 оны 01 сарын 25-нд УИХ-ын нэгдсэн чуулганаар хэлэлцсэн ч нарийвчлан боловсруулах шаардлагатай хэмээн үзэж, Засгийн газарт буцаасан юм.
Мөн энэ үеэр УИХ-ын гишүүд болон хууль боловсруулах ажлын хэсгийнхэн улсын бүртгэлийн сервер болон үйл ажиллагаатай танилцав. 2018 оны 04 сарын 09-ний өдрөөс эхлэн нэг цэгт төвлөрч байсан гадаад паспортын үйлчилгээг 10 цэгээр дамжуулан иргэдэд үзүүлдэг болсон. Тодруулбал, Баянгол, Сүхбаатар, Чингэлтэй, Хан-Уул, Сонгинохайрхан, Баянзүрх дүүргийн улсын бүртгэлийн хэлтэс, Драгон, Мишээл, Дүнжингарав, 7-н буудлын Оргил худалдааны төвд байрлах нийслэлийн үйлчилгээний нэгдсэн төвийн Улсын бүртгэлийн хэлтсээс иргэд харьяалал харгалзахгүйгээр гадаад паспортаа захиалж авдаг болсон. Ингэснээр маш их очер дараалал үүсгэж байсан гадаад паспортын үйлчилгээний ачаалал эрс буурчээ. Түүнчлэн Улсын бүртгэлийн төв Архивын байрны багтаамж, хүрэлцээ нь өнөөгийн шаардлагыг хангахгүй нөхцөлд байгаа учраас улсын бүртгэлийн эх нотлох баримт бүхий архив үрэгдэх, устгагдах өндөр эрсдэлтэй байгаа юм. Тиймээс нэн даруй стандарт, шаардлагад нийцсэн Архивын байртай болох шаардлагатай байгааг танилцуулав.
