Оюуны өмч, улсын бүртгэлийн ерөнхий газрын дэд дарга Д. Дэлгэрсайхан Дэлхийн Оюуны өмчийн байгууллагын Дэд захирал Ёшиюки Такагиг 2018 оны 04 сарын 25-ны өдөр хүлээн авч уулзлаа. Уулзалтад Дэлхийн Оюуны өмчийн байгууллагын Оюуны өмчийн газруудын бизнес шийдлийн хэлтсийн бүсийн ахлах Жүно Жанг болон Дэлхийн Оюуны Өмчийн Байгууллагын Төслийн менежер Кио Зо, ОӨУБЕГ-ын Тамгын газрын дарга Б. Бадамцэцэг, ОӨУБЕГ-ын Аж үйлдвэрийн өмчийн эрхийн газрын дарга С. Урангэрэл нар оролцов. 

Уулзалтын эхэнд ОӨУБЕГ-ын дэд дарга Д. Дэлгэрсайхан “ДОӨБ-аас 2016 оны 9 дүгээр сараас эхлэн хэрэгжүүлж буй Аж Үйлдвэрийн өмчийн удирдлагын WIPO IPAS /Вайпо Айпас/, WIPO EDMS /Вайпо И-ДИ-ЭМ-ЭС/, WIPO Publish /Вайпо Паблиш/, WIPO File /Вайпо файл/ системуудыг суурилуулах төсөл амжилттай хэрэгжиж  4 дүгээр сарын 26-ны өдөр буюу  Дэлхийн Оюуны өмчийн өдөрөөр бид цахим мэдүүлгийн систем болон оюуны өмчийн мэдээлэл хайлтын системийн нээлтийг хийх гэж байгаад  сэтгэл хангалуун байна. Аж үйлдвэрийн өмчийн эрхийн хамгаалалтын үйл ажиллагааг автоматжуулахад үнэлж баршгүй хувь нэмэр оруулж, маш богино хугацаанд том ажлыг амжилттай хэрэгжүүлсэнд  ДОӨБ-ын дэд захирал  ноён Ёшиюки Такаги түүний чадварлаг хамт олонд талархал илэрхийлье” гэлээ. 

Ноён Ёшиюки Такаги энэхүү төслийг Монгол улсад амжилттай хэрэгжүүлсэн ОӨУБЕГ-ын  Аж үйлдвэрийн өмчийн эрхийн газрын хамт олонд мөн талархал дэвшүүлэв. 

Уг уулзалтын хүрээнд дээрхи системийн ашиглалт, хамгаалалт, хөгжүүлэлт болон цаашдын чиг хандлага, хамтын ажиллагааны талаар санал солилцов.