Азийн хөгжлийн банк, Оюуны өмч, улсын бүртгэлийн ерөнхий газартай хамтран хэрэгжүүлж байгаа “Нийгмийн үйлчилгээний түгээлтийг сайжруулах зорилгоор бүртгэлийн системийг боловсронгуй болгох” төслийн нээлтийн үйл ажиллагаа боллоо. Нээлтийн арга хэмжээнд Азийн хөгжлийн банкны Монгол дахь Суурин төлөөлөгч Еланда Фернандез Ломмэн, Азийн хөгжлийн банкны Монгол дахь Суурин төлөөлөгчийн газрын ахлах эдийн засагч Деклан Магий, Хууль зүй, дотоод хэргийн яамны Гэрээ, эрх зүй, хамтын ажиллагааны газрын дарга Т.Бат-Өлзий, Оюуны өмч, улсын бүртгэлийн ерөнхий газрын дарга Р.Содхүү болон тус газрын удирдах ажилтнууд, албан хаагчид оролцов.
Энэ үеэр Оюуны өмч, улсын бүртгэлийн ерөнхий газрын дарга Р.Содхүү “Жил 4 сарын өмнө Монгол Улсын бүртгэлийн тогтолцоог сайжруулахад дэмжлэг үзүүлэхийг Азийн Хөгжлийн Банкнаас хүссэн. Бидний тавьсан хүсэлтийг хүлээн авч, бүртгэлийн үйлчилгээг боловсронгуй болгоход туслалцаа үзүүлж, хамтран ажиллахаар болсонд гүн талархал илэрхийлье. Тус төсөл нь “Нэг иргэн-Нэг бүртгэл” үндэсний хөтөлбөрийн салшгүй нэг хэсэг. Монгол орны өнцөг булан бүрт байгаа бүртгэгчид газар дээр нь шууд бүртгэл хийж нэгдсэн сандаа оруулах суурийг тавина. Хүүхэд төрсөн бол тэр дор нь бүртгэж мэдээллийг ирүүлэх боломжийг олгох чухал төсөл юм. Улсын бүртгэлийн үйлчилгээ илүү хүртээмжтэй, шуурхай болно. Энэхүү төслийг Азийн Хөгжлийн Банкны тусламжтайгаар хамтран хэрэгжүүлэхдээ таатай байх болно” гэлээ.
Тус төсөл нь улсын бүртгэлийн үйлчилгээний чанар, хүртээмжийг нэмэгдүүлэх, төрийн байгууллага хоорондын мэдээлэл солилцох дотоод сүлжээг сайжруулах, гар ажиллагаатай байдлаас цахим системд шилжих явцыг дэмжих, зөрүүтэй мэдээллийг багасгах, Улсын бүртгэлийн системийн чанарыг дээшлүүлэх зорилготой юм. Ингэснээр иргэн бүрийг тэгш байдлаар бүртгэлийн үйлчилгээнд хамруулахад чухал алхам болно.
Төслийн хүрээнд улсын бүртгэлийн онлайн сүлжээнд холбогдоогүй 305 сумыг шилэн кабельд холбож дуусгана. Мөн эмнэлгүүдэд цахим бүртгэлийн үйлчилгээг үзүүлэх систем бий болно. Эмнэлгүүд нь Улсын бүртгэлийн системийн чухал бүрэлдэхүүн хэсэг болох төрөлт, нас баралтын талаарх мэдээллээр хангадаг. Эмнэлгүүдэд төрөлтийн бүртгэлийн дугаарыг олгох боломжийг бүрдүүлэх үүднээс ОӨУБЕГ-ын програм хангамжийг сайжруулна. Мөн мэдээллийн санд мэдээлэл оруулах, мэдээлэл авах боломжийг хялбарчлах зорилгоор хэрэглэгчийн холболтыг шинэчлэх юм. Улсын бүртгэлийн бүх мэдээллийг нэгтгэсэн нэг мэдээллийн сан бүхий платформтой болгох зэрэг ажлуудыг хэрэгжүүлэх юм.
