Оюуны өмч, улсын бүртгэлийн байгууллагын удирдах ажилтны зөвлөгөөн 2018 оны 02 сарын 26,27-ны өдрүүдэд болж байна. Зөвлөгөөнд ерөнхий газрын газар, хэлтсийн дарга нар, нийслэл, дүүрэг, 21 аймгийн улсын бүртгэлийн хэлтсийн дарга нар, улсын бүртгэгчид, мэдээллийн технологийн ажилтан зэрэг 140 орчим албан хаагч оролцож байгаа юм. Зөвлөгөөнийн эхний өдөр байгууллагын 2017 оны үйл ажиллагааны тайлан, 2018 оны зорилт, иргэн, эд хөрөнгө, хуулийн этгээдийн улсын бүртгэл, улсын бүртгэлийн үйл ажиллагаанд хийсэн хяналт шалгалтын талаар танилцуулж, 2018 оны үр дүнгийн гэрээ байгууллаа.
Оюуны өмч, улсын бүртгэлийн газрын дарга С.Содхүү зөвлөгөөнийг нээж хэлсэн үгэндээ “Манай хамт олон шинэ бүтэц, зохион байгуулалтаар ажиллаж эхэлсэн цагаасаа хойш оюуны өмч, улсын бүртгэлийн салбарт олон чухал ажлыг хийж хэрэгжүүллээ. Өнгөрсөн хоёр жилийн хугацаанд бид энэ байгууллагыг хөл дээр нь босгох хүнд замыг хамтдаа амжилттай туулсан. Унтарч эхэлсэн Монгол Улсын бүртгэлийн нэгдсэн системийг өндөр эрсдэлээс хамгаалж, Төрийн ой санамжийн аюулгүй байдлыг хангаж, Монгол Улсад хамгийн том буюу 60 теребайт хэмжээтэй мэдээллийн сантай болж чадлаа. Үндэсний ой санамж 1, 2, 3 хөтөлбөрийг боловсруулж, ХЗДХЯ, Засгийн газраар дамжуулан Үндэсний аюулгүй байдлын зөвлөлд хүргүүлсэн. Бүртгэлийн байгууллага нь Монгол Улсын төрийн өмч, аюулгүй байдлын онцгой обьектын хувьд бүртгэл мэдээллийн нэгдсэн сангаа төрийн ой санамж гэж анх удаа тодорхойлж чадсан. Энэ бол Та бүхний маань гавьяа юм шүү. Монгол төрийн өмнө хүлээсэн үүргээ бид амжилттай биелүүлж байна. Одоо бид бүхэн бүртгэлийн үйл ажиллагааг боловсронгуй болгох “Нэг иргэн-нэг бүртгэл” Үндэсний хөтөлбөрийг хэрэгжүүлэн ажиллах болно. Хөтөлбөр удахгүй батлагдана. Та бүхэн энэ байгууллагын эзэн болж, хуулийн дагуу иргэддээ хүнд сурталгүй, чирэгдэлгүй, түргэн шуурхай үйлчлэхийг хичээнгүйлэн хүсч байна” гэлээ.
2017 онд тус байгууллагаас иргэний 19, эд хөрөнгийн 26, хуулийн этгээдийн 10, зохиогчийн эрхийн 3, аж үйлдвэрийн эрхийн 33, архивын 24, нийт 115 төрлийн үйлчилгээг иргэн, аж ахуйн нэгжид үзүүлэв.
Өнгөрсөн хугацаанд иргэний биеийн давхцахгүй өгөгдөлд суурилан бүх мэдээллийг нэг эх үүсвэрээс гаргах лавлагааны нэгдсэн хайлтын системийг бүрдүүлэв. Иргэний цахим үнэмлэхэд тоон гарын үсэг бичихэд бэлэн болгож, иргэн, эд хөрөнгө, хуулийн этгээдийн бүртгэлийн лавлагааг ТҮЦ машинаас авдаг боллоо. Мөн эд хөрөнгийн эрхийн цахим бүртгэлийн (ePRS) програм хангамжийг сайжруулж, 13 аймгийн бүртгэлийн төвүүдийг сүлжээнд холбох, иргэн, хуулийн этгээдийн бүртгэл, архив, гадаад паспортын үйлчилгээнд банкны карт уншигч пос машиныг нэвтрүүлсэн зэрэг томоохон ажлуудыг эхлүүлсэн.
Цаашид Монгол Улсын төр засгийн бодлого, зорилтын хүрээнд “Нэг иргэн, нэг бүртгэл” хөтөлбөр хэрэгжүүлэх замаар улсын бүртгэлийн үйл ажиллагааг боловсронгуй болгох, цаасанд суурилсан бүртгэлээс цахим бүртгэлд, мэдээлэлд суурилсан бүртгэлээс биеийн давхцахгүй өгөгдлөөр баталгаажсан бүртгэлд шилжиж, төрийн мэдээллийн нэгдсэн санг бий болгож, хүнд суртал, чирэгдэлгүй цахим үйлчилгээг иргэдэд үзүүлж, төрийн үйлчилгээг жигд тэгш авах нөхцөлийг бүрдүүлэх зэрэг томоохон ажлыг шат дараатай хэрэгжүүлэхээр төлөвлөн ажиллаж байна.
