Дэлхийн Оюуны өмчийн өдрийг угтан ОӨУБЕГ-ын Зохиогчийн эрхийн газар, Хяналтын газар, АНУ-ын Элчин сайдын яам, АНУ-ын худалдааны танхимтай хамтран “Зохиогчийн эрх, програм хангамж” сэдэвт хэлэлцүүлэг, ярилцлагыг зохион байгууллаа.

Тус хэлэлцүүлэгт ОӨУБЕГ-ийн дэд дарга Д.Дэлгэрсайхан, АНУ-ын Элчин сайдын яамны дэд тэргүүн Мануэл Микаллер, АНУ-ын ЭСЯ-ны худалдааны ахлах мэргэжилтэн Майкл Ричмонд болон Засгийн газрын хэрэг эрхлэх газрын Мэдээлэл технологийн газар, Харилцаа Холбооны Зохицуулах Хороо, Мэдээлэл харилцаа холбоо технологийн газар, Монголын програм хангамж үйлдвэрлэгчдийн холбоо” ТББ, Монголын зохиолч, хөгжмийн зохиолч, нийтлэлчдийн нийгэмлэгийн төлөөлөл оролцлоо. Хэлэлцүүлгийн үеэр “Програм хангамжийн зохиогчийн эрх” сэдвээр ОӨУБЕГ-ын Зохиогчийн эрхийн газрын дарга Э.Мягмардорж, “Кибер гэмт хэрэг: Интернэт дэх зохиогчийн эрхийн зөрчил” сэдвээр Хуульч, судлаач Л.Галбаатар, “Програм хангамжийн лицензийн асуудал” сэдвээр Монголын програм хангамж үйлдвэрлэгчдийн холбоог төлөөлж “IT Zone” ХХК-ийн тэргүүн дэд захирал Б.Цээсүрэн нар мэдээлэл хийж, оролцогчдын асуултанд хариулт өгч, санал солилцов.