Захирааны ерөнхий хуулийн 62 дугаар зүйлийн 62.1-д “Захиргааны хэм хэмжээний актын төслийг тухайн захиргааны байгууллагын цахим хуудас болон мэдээллийн самбарт 30-аас доошгүй хоногийн хугацаанд байрлуулж санал авна” гэж заасны дагуу “Улсын бүртгэлийн үйл ажиллагаанд хяналт шалгалт хийх журам”-ын нэмэлт, өөрчлөлтийн төслийг танилцуулж байна.
Монгол Улсын Улсын Их Хурлын 2016 оны 12 дугаар тогтоол, Монгол Улсын Засгийн газрын 2016 оны “Засгийн газрын агентлаг, төрийн байгууллагуудын бүтэц, зохион байгуулалтын талаар авах зарим арга хэмжээний тухай” 4 дүгээр тогтоол, Хууль зүй, дотоод хэргийн сайдын “Оюуны өмч, улсын бүртгэлийн ерөнхий газрын үйл ажиллагааны стратеги, зохион байгуулалтын бүтцийн өөрчлөлтийн хөтөлбөр, зохион байгуулалтын бүтцийг батлах тухай” 2016 оны А/16 дугаар тушаалаар Улсын бүртгэлийн ерөнхий газар, Оюуны өмчийн газрыг нэгтгэж, Оюуны өмч, улсын бүртгэлийн ерөнхий газар байгуулагдсан.
Байгууллагын бүтцэд өөрчлөлт орсноор үйл ажиллагааны чиглэл, түүнд тавих хяналт шалгалтын эрх зүйн орчинд оюуны өмчийн эрхийн хамгаалалттай холбогдох хяналт шалгалтын ажлын эрх зүйн орчинг бүрдүүлэх шаардлага бий болсон.
Иймд Улсын бүртгэлийн ерөнхий газрын даргын 2015 оны 12 дугаар сарын 11-ний өдрийн 1811 дүгээр тушаалаар батлагдсан “Улсын бүртгэлийн үйл ажиллагаанд хяналт шалгалт хийх журам”-д дараах нэмэлт, өөрчлөлтийг оруулах тухай ОӨУБЕГ-ын даргын тушаалын төслийг боловсруулав. Үүнд:
• Хяналт шалгалтын үйл ажиллагааны чиглэлд оюуны өмчийн эрхийн хамгаалалтыг нэмэх;
• Үйл ажиллагаандаа баримтлах зарчимд “хяналт шалгалтын үр дүнд авч хэрэгжүүлэх арга хэмжээ, үйл ажиллагааны талаар эцэслэн шийдвэрлээгүй асуудлыг урьдчилан бусдад мэдээлэхгүй байх” хэсгийг шинээр нэмэх;
• Байгууллагын нэр, нэгжийн нэр өөрчлөгдсөнтэй холбоотойгоор зохих өөрчлөлтийг тусгах;
• Дүүргийн хяналтын улсын байцаагч нарын дүгнэлтийг Нийслэлийн хяналтын улсын /ахлах/ байцаагч хянаж байсныг өөрчилж, аймаг, нийслэл, дүүргийн хяналтын улсын /ахлах/ байцаагч нарын дүгнэлтийг хянах ажиллагааг Хяналтын газрын даргын баталсан хуваарийн дагуу нэгжийн хяналтын улсын /ахлах/ байцаагч ажлын 3 хоногийн дотор цахим санд хянан баталгаажуулж байхаар өөрчлөх зэрэг болно.
“Улсын бүртгэлийн үйл ажиллагаанд хяналт шалгалт хийх журам”-ын нэмэлт өөрчлөлтийн төслийг Захиргааны ерөнхий хуулийн 62 дугаар зүйлд заасны дагуу байгууллагын цахим хуудас болон мэдээллийн самбарт 30-аас доошгүй хоногийн хугацаанд байрлуулж санал авсны дараа мөн хуулийн 64 дүгээр зүйлд зааснаар ОӨУБЕГ-ын даргын тушаалаар баталж, улсын нэгдсэн бүртгэлд бүртгүүлснээр хүчин төгөлдөр болн
Энэхүү тушаалын төсөл батлагдсанаар Оюуны өмч, улсын бүртгэлийн үйл ажиллагаанд тавих хяналт боловсронгуй болж, төрийн үйлчилгээг иргэн, хуулийн этгээдэд түргэн шуурхай хүргэх, оюуны өмч, улсын бүртгэлийн үйл ажиллагаа үнэн зөв, бодитой байх зарчим болон хууль тогтоомжийн хэрэгжилтийг хангахад дэмжлэг үзүүлэхэд оршино.
Иймд “Улсын бүртгэлийн үйл ажиллагаанд хяналт шалгалт хийх журам”-ын нэмэлт, өөрчлөлтийн төсөлд саналаа доорх хаягаар ирүүлнэ үү.
Цахим хаяг: This email address is being protected from spambots. You need JavaScript enabled to view it.
ХЯНАЛТЫН ГАЗАР
