Оюуны өмч, улсын бүртгэлийн ерөнхий газраас зохион байгуулж буй “Инновацийн шийдэл-бидний амьдралд” уралдаант шалгаруулалтын оролцогчдод зориулан чиглүүлэх сургалт зохион байгуулав.

  Дэлхийн Оюуны өмчийн байгууллага, БНСУ-ын Оюуны өмчийн газрын дэмжлэгтэйгээр гурав дахь жилдээ зохион байгуулагдах тус уралдаант шалгаруулалтанд 60 гаруй оролцогч өөрсдийн бүтээлээр өрсөлдөхөөр бүртгүүлээд байгаа  юм.

Энэ жилийн уралдаант шалгаруулалтын хувьд дан ганц оновчтой технологийн шийдэл бус оновчтой дизайныг хослуулж байгаа нь онцлог юм. Ингэснээр илүү онцгой болж, зах зээлд өрсөлдөх боломж нь улам бүр нэмэгднэ гэж зохион байгуулагчдын зүгээс үзэж байна. 

Чиглүүлэх сургалтын хүрээнд “Оновчтой технологи ба оновчтой дизайны уралдаант шалгаруулалтын танилцуулга”, “Шинэ бүтээл ба бүтээлч сэтгэлгээ”, “Оновчтой технологи болон оновчтой дизайн боловсруулахад оюуны өмчийн мэдээллийг ашиглах нь” зэрэг сэдвээр мэдээлэл өгч, оролцогчдын сонирхсон асуултанд хариулт өглөө. 

Сургалтанд ОӨУБЕГ-ын Аж үйлдвэрийн өмчийн эрхийн газрын дарга С.Урангэрэл, Дэлхийн Оюуны өмчийн байгууллагын Ази, Номхон далайн бүсийн газрын зөвлөх ноён Таэмин Еом, БНСУ-ын шинэ бүтээлийг дэмжих нийгэмлэгийн Оновчтой технологийн агийн ахлагч хатагтай Хуа-жэ Вон болон өнгөрсөн оны уралдааны ялагч, судлаач, зохион бүтээгчдийн төлөөлөл оролцсон.