Улсын бүртгэлийн байгууллага үүсэн байгуулагдсаны 76 жилийн ой, Улсын бүртгэлийн ажилтны өдрийг тохиолдуулан төрийн бүртгэлийн үйлчилгээг иргэдэд
хүргэхийн төлөө мэдлэг оюун, хүч хөдөлмөрөө зориулсан үе үеийн ахмад буурлууд тэдний залгамж халаа болсон нийт ажилтан албан хаагчид, тэдгээрийн гэр бүлийнхэн мөн хамтран ажилладаг байгууллага хамт олон, ард иргэд та бүхэндээ чин сэтгэлийн мэндчилгээ дэвшүүлье.
Одоогоос 76 жилийн өмнө буюу 1940 оны 11 дүгээр сарын 23-ны өдрийн БНМАУ-ын Ардын Сайд нарын зөвлөлийн 44 дүгээр тогтоолоор “Иргэний паспортын дүрэм”-ийг баталж, Монгол Улс өөрийн хүн амыг нас, хүйсээр нь бүртгэсэн өрхийн дэвтрийг хөтөлж эхэлснээр улсын бүртгэлийн байгууллага үүсэн байгуулагдсан түүхтэй.
Улмаар 1992 оны шинэ Үндсэн хуулиар иргэд эд хөрөнгө шударгаар олж авах, эзэмших, өмчлөх, өв залгамжлах, хувийн аж ахуй эрхлэх эрх, эрх чөлөөг баталгаажуулснаар бүртгэлийн байгууллагын үйл ажиллагааны хамрах хүрээ өргөжин эдүгээ иргэний, эд хөрөнгийн, хуулийн этгээдийн бүртгэл, оюуны өмчийн чиглэлээр өргөн цар хүрээтэй үйл ажиллагаа бүхий бүртгэлийн нэгдсэн тогтолцоотой Монгол Улсын Засгийн газрын хэрэгжүүлэгч агентлаг болон хөгжөөд байна.
Улсын бүртгэлийн алба үүсч байгуулагдсан цагаасаа эхлэн монгол хүн, монгол иргэддээ суурилсан улсын бүртгэлийн нэгдсэн бодлого тогтолцоо, төрийн ухаалаг ой санамжийг бүрдүүлэн, төр улс, иргэн, хуулийн этгээдүүдийг бүртгэлийн үнэн зөв мэдээллээр ханган үйлчлэх, үндэсний аюулгүй байдлаа бэхжүүлэх, бүртгэлийн бүтээлч чанарыг улам төгөлдөршүүлж, улс орныхоо эдийн засгийн өсөлтөд нөлөө дэмжлэг үзүүлэх зэргээр хуулиар хүлээсэн чиг үүргээ нэр төртэй биелүүлж ирлээ.
Тус байгууллага нь 76 жилийн түүхэн хугацаандаа цаасанд суурилсан бүртгэлээс цахим бүртгэлд, мэдээлэлд суурилсан бүртгэлээс биеийн давхцахгүй өгөгдлөөр баталгаажсан бүртгэлд шилжин, төрийн мэдээллийн нэгдсэн санг бий болгож, хүнд суртал, чирэгдэлгүй цахим үйлчилгээг иргэд, олон нийтэд үзүүлэхийн төлөө ажилласан нөр их хөдөлмөр, хичээл зүтгэлийн он жилүүд байлаа.
Бүртгэлийн нэгдсэн бодлого тогтолцоонд шилжиж, шинэчлэлийг үе шаттайгаар хэрэгжүүлснээр иргэний сонгох, сонгогдох эрхийг баталгаажуулж төрийн шударга сонгуулийг явуулахад оролцогч, төрийн ой санамж болсон суурь мэдээллийг төрийн бусад үйлчилгээнд түгээгч байгууллага болж үйл ажиллагаа өргөжин тэлж байна.
Цаашид Монгол Улсын төр засгийн бодлого, зорилтын хүрээнд “Нэг иргэн, нэг бүртгэл” хөтөлбөр хэрэгжүүлэх замаар улсын бүртгэлийн үйл ажиллагааг боловсронгуй болгох, зайлшгүй шаардлагатай улсын бүртгэлийн шинэ баазыг бүтээн ашиглах, бүртгэлийн үйл ажиллагааг онлайн горимд бүрэн шилжүүлж, үндэсний цахим баримт бичгийн хэрэглээг нэмэгдүүлэх, төрийн үйлчилгээг жигд тэгш авах нөхцөлийг бүрдүүлэх зэрэг томоохон ажлыг шат дараатай хэрэгжүүлэхээр төлөвлөж байна.
Эдгээр ажлыг Та бид хамтран хэрэгжүүлж, улсын бүртгэлийн үйлчилгээг шинэ шатанд гаргаж, нэгэн шинэ түүхийг бүтээнэ гэдэгт итгэлтэй байна.
Төрийн өмнө хуулиар хүлээсэн үүргээ нэр төртэй биелүүлж, бүртгэлийг төгөлдөршүүлэх их үйлсэд оюун ухаан, хүчин чармайлтаа дайчлан ажиллаж байгаа салбарын нийт хамт олондоо ажил хөдөлмөрийн өндөр амжилт хүсч, аз жаргал, эрүүл энх, сайн сайхан бүхнийг хүсэн ерөөе.
Иргэнээ хүндэтгэн үйлчилсэн төр, Төрөө хүндэтгэн дээдэлсэн Монголчуудын үйлс сайн сайхнаар өрнөн дэлгэрэх болтугай.
ОЮУНЫ ӨМЧ, УЛСЫН БҮРТГЭЛИЙН ЕРӨНХИЙ ГАЗРЫН
ДАРГА Р.СОДХҮҮ
