Тус газрын дарга Р.Содхүү өнөөдөр Дэлхийн банкны Мэдээлэл, харилцаа холбоо, технологийн хөтөлбөрийн зохицуулагч, “Ухаалаг засаг” төслийн багийн ахлагч Тэнзин Долма Норбуг болон албаны төлөөлөгчдийг хүлээн авч уулзлаа. 

ОӨУБЕГ нь Дэлхийн банкны санхүүжилтээр Монгол Улсын Засгийн газраас хэрэгжүүлж буй “Ухаалаг Засаг” төслийн хүрээнд  “Монгол Улсад эд хөрөнгийн эрхийн бүртгэлийн цахим систем бүрэн нэвтрүүлэх” дэд бүрэлдэхүүн хэсгийг хэрэгжүүлж байгаа билээ.

Төслийн гүйцэтгэлийг хэлэлцэх, цаашид хэрэгжүүлэх ажлын талаар санал солилцох зорилго бүхий энэхүү уулзалтаар Дэлхийн банкны “Ухаалаг засаг” төслийн шинээр томилогдсон багийн ахлагч,  МХТ-ийн ахлах эдийн засагч Петер Силарскитай танилцаж, цаашид хэрэгжүүлэх төлөвлөгөөт ажлын талаар 2 тал санал солилцов. Дэлхийн банкны зүгээс тус газарт хэрэгжиж буй уг төслийн ажил цаг хугацаандаа, хууль тогтоомжийн дагуу шуурхай явагдаж байгааг энэ үеэр онцлов. 

Эд хөрөнгийн эрхийн бүртгэлийн үйл ажиллагааг нийслэлийн 9 дүүрэг, 21 аймгийн төв дэх Улсын бүртгэлийн хэлтэс эрхлэн явуулдаг бөгөөд одоогийн байдлаар улсын хэмжээнд 9 дүүрэг, 8 аймгийн эд хөрөнгийн эрхийн бүртгэлийн  архивын баримт цахим хэлбэрт шилжиж, цахим систем (ePRS)-д холбогдоод байгаа юм. Тэгвэл уг нэгдсэн системд холбогдоогүй Архангай, Баян-Өлгий, Баянхонгор, Булган, Говь-Алтай, Говьсүмбэр, Дорноговь, Дундговь, Өмнөговь, Сүхбаатар, Сэлэнгэ, Увс, Хөвсгөл аймгийн эд хөрөнгийн бүртгэлийн архивын баримтыг “Ухаалаг засаг” төслийн хүрээнд үргэлжлүүлэн цахимжуулж эхлээд байна.

Энэхүү  төслийн зорилго нь Монгол Улсын нийслэл, нийт аймгийг хамарсан эд хөрөнгийн эрхийн бүртгэлийн нэгдсэн системд бүрэн нэвтрүүлж, шилжүүлэх, цахим бүртгэлийн (ePRS) програм хангамжийг сайжруулах, нэгдсэн цахим системд холбогдоогүй дээрх 13 аймгийн бүртгэлийн төвүүдийг нэгдсэн сүлжээнд холбож улмаар энэ чиглэлийн нэгжүүдийн чадавхийг нэмэгдүүлж, цахим бүртгэлийн орчин бүрдүүлэх чухал ач холбогдолтой.