Оюуны өмч, улсын бүртгэлийн ерөнхий газрын даргын зөвлөлийн анхдугаар хуралдаан өнөөдөр боллоо. Хуралдааны эхэнд ХЗДХЯ-ны Бодлогын хэрэгжилтийг зохицуулах газрын дарга Э.Энхтуяа “Монгол Улсын Засгийн газрын 2016-2020 оны үйл ажиллагааны хөтөлбөр”-ийг ОӨУБЕГ-ын дарга Р.Содхүүд гардуулан өглөө. 

Энэ үеэр тус газрын дарга Р.Содхүү баримт бичгийг талархан хүлээж аваад тус хөтөлбөрийн хэрэгжилтийг хангахад Оюуны өмч, бүртгэлийн байгууллага  чухал үүрэгтэй гэдгийг онцолсон. Мөн тэрээр бүртгэлийн байгууллагын хамт олон бид “Монгол Улсын Засгийн газрын 2016-2020 оны үйл ажиллагааны хөтөлбөр” –ийг хэрэгжүүлэхэд хуулиар хүлээсэн үүрэг, улс эх орныхоо ирээдүйн сайн сайхныг цогцлоохын төлөө хамтдаа гар бие, сэтгэл зүрхээ нэгтгэн өмнөө тавьсан зорилт, зорилгоо нэр төртэйгээр биелүүлж, хэрэгжүүлж чадна гэдэгт итгэлтэй байна гээд удирлагууд, албан хаагчдад амжилт хүслээ.

Даргын зөвлөлийн анхдугаар хуралдаанаар “Засгийн газрын 2016-2020 оны  үйл ажиллагааны хөтөлбөр”-ийн хүрээнд тус газраас хэрэгжүүлэх ажлын төлөвлөгөө, улсын байцаагч томилох зэрэг асуудлыг хэлэлцэж, шийдвэрлэлээ. 

Дээрх хөтөлбөрт тус газраас нийт 19 зорилтын хүрээнд 35 арга хэмжээг хэрэгжүүлэхээр төлөвлөгөөний төсөлд тусгасан бөгөөд төслийг ирэх 7 хоногт дахин хэлэлцэж, эцэслэх юм.

“Монгол Улсын Засгийн газрын 2016-2020 оны үйл ажиллагааны хөтөлбөр” нь Монгол Улсад бий болсон эдийн засаг, санхүүгийн хүнд нөхцөлд улс орныхоо эдийн засгийг богино хугацаанд сэргээж, өсөлтийг бий болгон нийгмийн салбаруудыг дэмжиж, иргэдийнхээ аж амьдралыг эрс сайжруулахад оршино. Мөн төрийн албыг чадавхжуулах, бүх шатанд мэргэшсэн албан хаагчидтай байж, төрийн үйлчилгээг хөнгөн шуурхай, чирэгдэлгүй, ил тод, нээлттэй үзүүлэх, нийгмийн итгэлцлийг бэхжүүлэн, улс үндэстний аюулгүй байдлыг баталгаажуулахад чиглэсэн тодорхой зорилтуудыг дэвшүүлсэн.