Монгол-Орос-Хятадын Оюуны өмчийн байгууллагуудын “Оюуны бүтээлч үйл ажиллагааны үр дүнг хамгаалах, эдийн засгийн эргэлтэд оруулах асуудал: Технологи, инновацийг дэмжих төв ба жижиг, дунд үйлдвэр” сэдэвт 4 дэх удаагийн бага хурал өнөөдөр Туушин зочид буудалд боллоо.

 Энэхүү бага хурлын нээлтэнд Монгол Улсын Хууль зүй, дотоод хэргийн сайд С.Бямбацогт мэндчилгээ дэвшүүлж үг хэллээ.  Мөн Монгол Улсын Оюуны өмч, улсын бүртгэлийн ерөнхий газрын дарга Р.Содхүү, БНХАУ-ын Оюуны өмчийн газрын дарга ноён Шэнь Чанью болон ОХУ-ын Оюуны өмчийн Холбооны албаны дарга ноён Г.П.Ивлиев  нар тус тус нээж үг хэлэв.

Хурлын үеэр “ОХУ дахь оюуны өмчийн салбарын хөгжил” ОХУ, “Оюуны өмчийн тогтолцоог хөгжүүлэх үндэсний стратеги” Монгол Улс, “БНХАУ дахь оюуны өмчийн хамгаалалт” БНХАУ, “БНХАУ дахь оюуны өмчийг эдийн засгийн эргэлтэд оруулах асуудал, жижиг, дунд үйлдвэрт үзүүлэх дэмжлэг” БНХАУ, “ОХУ дахь Технологи, инновацийн төвүүдийн хөгжил” ОХУ, “Татарстан улс дахь оюуны өмчийн зах зээлийн хөгжил” ОХУ, “Технологи, инновацийг дэмжих төвүүд ба жижиг, дунд үйлдвэрт үзүүлэх дэмжлэг” Монгол Улс  зэрэг итгэлүүдийг хэлэлцэж, хөрш 3 улсын оюуны өмчийн салбарын цаашдын хөгжлийн чиг хандлага, шилдэг туршлага, ололт амжилтын талаар харилцан танилцуулж, санал бодлоо солилцсон юм.

Энэ удаагийн 4 дүгээр бага хурлын ач холбогдол нь Монгол Улсын эрдэмтэн, судлаачид, зохион бүтээгчдийн үйл ажиллагааны үр дүнд бий болсон судалгааны ажил буюу оюуны бүтээлүүдийг эдийн засгийн эргэлтэнд хэрхэн яаж оруулах, технолги инновацийг дэмжих төвүүдийн үйл ажиллагааг идэвхижүүлэх, жижиг дунд үйлдвэрүүдэд оюуны бүтээлүүдийг хэрхэн ашиглах талаар зохих мэдлэг болон энэ үйл ажиллагааг хэрэгжүүлэх тодорхой гарц, арга, хэлбэрийг бий болгох явдал юм. 

Монгол Улсын Оюуны өмч, улсын бүртгэлийн ерөнхий газар, БНХАУ-ын Оюуны өмчийн газар болон ОХУ-ын Оюуны өмчийн Холбооны албаны 3 талын өндөрлөх уулзалт маргааш Төрийн ордонд болно. Уулзалтаар “Гурван улсын Оюуны өмчийн чиглэлээр 2016-2017 хамтарч ажиллах төлөвлөгөө”-г батлан гаргана. 

Мөн Монгол-Орос-Хятадын Оюуны өмчийн байгууллагуудын бага хурлыг жил бүр зохион байгуулдаг уламжлалын дагуу ирэх жил зохион байгуулагдах 5 дахь удаагийн бага хурлыг ямар улсад зохион байгуулах талаар талууд харилцан тохиролцож шийдвэрлэх юм.